इन्द्रावती ४ का किसानहरूलाई मिनिटिलर वितरण

नवलपुर ।
इन्द्रावती गाउँपालिका वडा नम्बर ४ ले किसानहरूलाई मिनिटिलर वितरण गरेको छ। वडाको आर्थिक वर्ष २०८२/८३ को वार्षिक स्वीकृत कार्यक्रम अन्तर्गत मागमा आधारित २३ वटा मिनिटिलर वितरण गरिएको हो । २९ हजार लागत पर्ने मिनिटिलर किसानहरूले ५० प्रतिशत अनुदानमा पाएका छन् ।

कार्यक्रममा बोल्दै वडा अध्यक्ष क्षेत्र बहादुर तामाङले स्रोतको कमी हुँदाहुँदै पनि किसानहरूको सहजताका लागि कार्यक्रम सञ्चालन गरिएको बताए । वडाका सबै नागरिक कृषिमा आबद्ध भएकाले प्राप्त मिनिटिलरलाई समूहमा मिलेर सञ्चालन गर्न आग्रह गर्दै वडाले किसानलाई व्यावसायिक बनाउन निरन्तर पहल गरिरहेको बताए । साथै कृषिको स्रोत वृद्धि र लक्षित वर्गका लागि विभिन्न कार्यक्रम सञ्चालन गर्दै अघि बढ्ने प्रतिबद्धता व्यक्त गरे ।

त्यसैगरी वडा नम्बर ७ का अध्यक्ष रविन्द्र कुमार खातीले वडा नं. ४ का अध्यक्ष कृषिमा केही गर्नुपर्छ भन्ने सोचबाट प्रेरित भएको उल्लेख गर्दै किसानलाई आधुनिक कृषि तथा यान्त्रिकीकरणतर्फ अग्रसर गराउन यस्ता कार्यक्रम प्रभावकारी भएको बताए । उनले वडा नं. ४ को कामबाट प्रेरित हुँदै आफ्नो वडामा समेत यस्ता कार्यक्रम सञ्चालन गरिएको जानकारी दिए । कम समयमा धेरै काम गर्न सहयोग पुग्ने भएकाले मिनिटिलरको सही सदुपयोग गर्न किसानहरूलाई आग्रह गरे ।

कार्यक्रममा वडा नम्बर ७ का अध्यक्ष दिल कुमार श्रेष्ठले आधुनिक कृषिका लागि किसानहरूको सहजताका निम्ति मिनिटिलर वितरण गरिएको उल्लेख गर्दै यसको उचित सदुपयोग गर्न आग्रह गरे ।

वडा सचिव देवीमाया सुनारले सञ्चालन गरेको कार्यक्रममा वडाका किसानहरूको उपस्थिति रहेको थियो ।