त्रिपुरासुन्दरीका सबै वडासहित प्रमुख, उपप्रमुख जित्ने योजनामा छौं–सुकदेव रिसाल

              अघिल्लो स्थानीय तह निर्वाचनमा सिन्धुपाल्चोक जिल्लाको त्रिपुरासुन्दरी गाँउपालिकाको ६ वटा वडा मध्ये ३ वटा वडा सहित पालिका अध्यक्ष र उपाध्यक्षमा जित  निकाल्न सफल नेकपा (एमाले) आगामी बैशाख ३० गते हुने स्थानीय तहको निर्वाचनमा सबै वडा सहित पालिकाको सत्ता हत्याउने दाउमा छ तर यो बिचमा एमालेमा आएको फुट र सत्ता गठबन्धन बिचको सहकार्यको सम्भावनाले एमालेको सपना साकार हुन कठिन देखिएको छ । आगामी निर्वाचनसंग सम्बन्धित रहेर नेकपा (एमाले) बाट पालिका अध्यक्षका आकांक्षी रहेका हालका निर्वाचित वडा अध्यक्ष सुकदेब रिसालसंग नयाँपानी खबरकालागि रामकृष्ण थापाले गरेको कुराकानीको संक्षिप्त अंश  :

स्थानीय तह चुनावमा तपाइँको आकांक्षा रहेको पाइयो, यति महंगो चुनाव किन लड्न चाहनुहुन्छ ?

वास्तवमा मेरो दाबेदारी स्वाभाविक छ । म एक जुझारु युवा भएको र मेरो ५ बर्षे वडा अध्यक्षको कार्यकाल सफल रहेको दाबी गर्न चाहन्छु । अब रह्यो महंगो निर्वाचन को कुरा, वास्तबमा निर्वाचन खर्चिलो हुन्छ नै । हाम्रो पालिकाको सन्दर्भमा त्यस्तो छैन र हुन्न पनि । पार्टीले सबैले आसा गरेका, बिश्वास गरेका, भिजन भएका, पढेलेखेका, निश्कलंक र सबैको भावनाको कदर गर्नसक्ने युवा जोसजागर भएका उम्मेदवार खडा गर्न सक्यो भने सामान्य खर्चभन्दा बाहेक ठूलो रकम आवस्यक छैन र हुँदैन पनि । र, जसलाई उम्मेदवार बनाउँदा ठूलो रकम खर्च गरेर निर्वाचनमा भिड्न पर्छ, त्यस्ता उम्मेदवार खडा गर्न  हुन्न भन्ने लाग्छ  । मेरो सवालमा त्यस्तो धेरै रकम खर्च गर्नुपर्ने देखिन्न । निर्वाचन लड्ने भनेको आफ्नो सरकारले बनाएको योजनालाई आफ्नो कार्यकालमा  जतिसक्दो जनभावना अनुरुप समाज रुपान्तरणको लागि निश्पक्ष, निस्वार्थ भएर बिकासका कार्यक्रमहरु सम्पन्न गर्न र गराउन मैले निर्वाचन लड्न जरुरी छ ।

तपाइँले टिकट पाउने आधार के–के हुन् ?

मैले टिकट पाउने आधार भनेको म उर्जाशील युवा हो । वडाध्यक्षको अनुभव प्राप्त गरिसकेको छु । वडाध्यक्ष हुँदा जिल्लामा एउटा मोडेल खडा गरेको छु । मैले सफलतापूर्वक काम गरेँ । १०३ वडामध्ये सबैभन्दा बढी योजना ल्याएर काम गरेको मेरो अनुभव छ । हाम्रो पालिकामा रहेको ६ वडामध्ये सबैभन्दा बढी मत मैले ल्याएको हो । यही मत अब पनि निर्णायक हुन्छ । टिकट पाएको दिनदेखि नै मेरो माहोल विजयतर्फ लाग्ने छ ।

टिकट पाउनुभयो भने चुनावी खर्च कसरी जुटाउनुहुन्छ ?

मैले टिकट पाउँदा चुनावी खर्चको धेरै आवश्यकता पर्दैन । मेरो पार्टीमा रहेका नेता तथा कार्यकर्ताले गरेको सहयोगबाटै चुनाव खर्च पुग्छ । चुनावमा खर्च बढी गर्नु भनेको भ्रष्टाचारको सुरुवात हो । यस्तो गरिन्न । जनप्रतिनिधि बन्न ठूलो रकम खर्च गर्ने र स्थानीय सरकारलाई आएको विकास बजेट भ्रष्टाचार गर्नुपर्ने बाध्यताको अन्त्य गर्न चाहन्छु । चुनाव खर्च साथीभाइबाट जम्मा भएको रकमलाई सदुपगोय गर्ने योजना बनाइन्छ ।

जनमत माग्ने तपाइँको मार्गचित्र के–के हुन् ?

मत माग्ने मार्गचित्र भन्दा पनि मैले पाँच वर्ष वडाअध्यक्ष भएर गरेको गतिविधि, योजना, भिजन र सफलता नै मेरो मत माग्ने प्रमुख सुत्र हुनेछन् । म पढेलेखेको जुझारु युवा हुँ  । कोही कसैलाईप क्षपात गरेर काम गर्ने मेरो तरिका छैन । पक्षविपक्ष सबैलाई समान व्यवहार गरेर काम गर्ने हो । मेरो कार्यकालमा गाडीको सुविधा लिने छैन । नीतिगत भ्रष्टाचार न्यूनीकरण, स्वरोजगार सिर्जना गरेर आयआर्जन बढाउने र जनतालाई धनी बनाउने , पूर्वाधार निर्माणमा जोड दिने र विकास निर्माणलाई समयसापेक्ष बनाउने योजना निर्माण गर्नेछु ।

तपाइँको पार्टी र अन्य प्रतिस्पर्धी दलको हालको अवस्था कस्तो छ ?

नेकपा (एमाले) त्रिपुरासुन्दरी गाउँपालिकाको अवस्था अन्य पार्टीको भन्दा मजबुत छ । सांगठनिक हिसाबले हामी बलियो र व्यवस्थित छौं । हाम्रो प्रतिस्पर्धी दल काँग्रेस हो । यसपटक सबै वडासहित प्रमुख, उपप्रमुख जित्ने योजनामा छौं । केही वडामा काँग्रेससँग कडा टक्कर हुन्छ । सबै दलको सह अस्तित्वलाई हामी सम्मान गर्छौं ।