स्कुले बालबालिकाकाे मुहारमा खुशी छर्दै कर्मयाेग फाउन्डेसन

इन्द्रावती, सिन्धुपाल्चोक ।महा बिनाशकारी भुकम्प पछि सामुदायिक विद्यालयका रहर लाग्दा भवनहरु त बने तर साना साना बालबालिकालाई खुशी र उत्साहित बनाउने खेलमैदान र खेलकुद सामग्री नहुदा उनीहरुकाे स्कुलप्रतिकाे लगाव कम बनिसकेको सन्दर्भमा कर्मयाेग फाउन्डेसनको एउटा सत्प्रयासले इन्द्रावती गाउँपालिका वडा नं ८ स्थित पञ्चकन्या आधारभूत विद्यालयका बालबालिकाकाे मुहारमा खुशी छाएको छ ।

अमेरिकामा वस्ने नेपालीहरुकाे संस्था Bay Area Families काे सहयाेग र कर्मयाेग फाउन्डेसनकाे समन्वयमा अहिले पञ्चकन्या आधारभूत विद्यालयकाे प्रांगण खेलकुदका सामानले सुसज्जित देखिएको छ । बालबालिकाहरु काेहि पिङमा, काेहि चिप्लेटीमा र काेही साइकलमा रमाइरहेका देखिन्छन् । खेर गएका बाइक र गाडीका टायरहरुलाई सदुपयोग गरेर थुप्रै खेल सामग्रीहरु बनेका छन् ।वेस्टेज गइरहेका सामाग्रीहरुलाई विभिन्न किसिमबाट रंगाएर खेलकुद सामाग्रीमा प्रयोग गर्दा वातावरण पनि सफा हुने र बालबालिकालाई खेलकुद र मनाेरञ्जन पनि हुने फाउन्डेसनका अध्यक्ष साैरभ रिमाल बताउँछन् ।

यसरी खेर गइरहेका सामानकाे प्रयाेग गरि खेलकुद सामाग्रीकाे निर्माण गर्दा कम खर्चका धेरै सामान पनि बनाउन सकिन्छ ।फाउन्डेसनकाे उदेश्य बालबालिकामा वातावरण प्रति सचेतना जगाउदै मनाेरञ्जनात्मक वातावरणमा सिकाई उपलब्धि हासिल हाेस भन्ने रहेको अध्यक्ष रिमालकाे भनाइ छ । कर्मयाेग फाउन्डेसनले सिकाई र वातावरणसंग जाेडिएर हालसम्म सिन्धुपाल्चोक सहित २ हजार भन्दा बढी बालबालिकाहरुमा यस्ता कार्यक्रमहरु सञ्चालन गरिसकेको छ ।

हिजो असार ११ गते पञ्चकन्या आधारभूत विद्यालयले आयाेजना गरेको बालमैत्री खेलमैदान र खेलकुद सामाग्री हस्तान्तरण कार्यक्रममा प्रमुख अतिथि इन्द्रावती गाउँपालिका वडा नं ८ का वडा अध्यक्ष दिलकुमार श्रेष्ठले सहयोगका लागि कर्मयाेग फाउन्डेसन र Bay Area Families लाई आभार र धन्यवाद ज्ञापन गर्दै आगामी दिनमा पनि शैक्षिक सुधारका क्रियाकलापमा फाउन्डेसनको सहयोग रहने अपेक्षा व्यक्त गर्नुभयो ।

कार्यक्रममा बाेल्दै फाउन्डेसनका अध्यक्ष रिमालले आगामी दिनमा पनि अन्य विद्यालयमा यस्ता कार्यक्रम गर्न फाउन्डेसन उत्साहित रहेको तर विद्यालय व्यवस्थापन र विद्यालय प्रशासनले पनि उत्तिकै साथ दिनुपर्ने बताउनुभयो ।