सरल र साहसी, राजनीतिका पारदर्शी गंगाबहादुर

बलेफी गाउँपालिकामा अध्यक्षका उम्मेदवार गंगाबहादुर तामाङ तत्कालीन माओवादी जनयुद्धका साहसी कमाण्डर हुन् । साहसी त हुन्, मानिसहरु सोच्ने गर्छन् कमाण्डर भनेको डरलाग्दो हुन्छ । तर, तामाङ निकै सरल र मिजासिला छन् । उनलाई जनयुद्धमा प्रवेश भनेर चिनिन्थ्यो । अहिले पनि कतिपयले उनलाई प्रवेश नै भनेर चिन्छन् ।
स्थानीय तहको पहिलो निर्वाचनमा प्रवेशले थोरै मतान्तरले हारे । जितेका एमाले नेता केदार क्षेत्री सबै जिम्मेवारी त्यागेर काँग्रेस छिरेका छन् । बलेफीका स्थानीयले आजकाल भन्छन्, ‘जनप्रतिनिधि सरल र जनताको पहुँचको मानिस हुनु पर्दोरहेछ । त्यस्तो व्यक्ति प्रवेश हुन् ।’ चुनाव हारेपनि उनले गाउँघर छोडेनन् । निरन्तर जनताको घरदैलोमा पुगिरहे । सायद त्यसैको प्रभावले होला, अहिले तामाङको चुनावी माहोल उत्साहप्रद छ र स्थानीयको चासो अरुमा भन्दा उनमा बढी छ । तामाङसँग भिड्ने काँग्रेसका उम्मेदवार सुवास तिमल्सिना चीनबाट काठमाडौ सामान ल्याउने एक व्यापारी हुन् । उनको धन्दालाई नेता मोहन बस्नेतको संरक्षण छ । एमाले नेता नारायणकाजी पनि सरल उम्मेदवार हुन् । तर, पार्टी विभाजन र क्षेत्रीले धोका दिएर अध्यक्ष पद नै छोडी काँग्रस छिरेको कारण अवस्था कमजोर रहेको स्थानीय बताउँछन् ।

माओवादी जनयुद्धका बेला उनी जनमुक्ति सेनाको कम्पनी कमाण्डर थिए । कुनै समय उनले तीन सयसम्म जनमुक्ति सेनालाई कमाण्ड गरेर विभिन्न मोर्चाको नेतृत्वसमेत गरे । दर्जनौं भिडन्तमा सामेल भए । गोलीको पर्रा, बारुदको छर्रा र चोटैचोटले भरिएको शरीरलाई अहिले पनि निरन्तर राजनीतिमा लगाउनु उनको अर्को साहसी काम हो । तामाङ सानो ठूलो भन्दैनन् । सबैसँग बराबर सम्बन्ध र व्यवहार गर्छन् । तुने चप्पल लगाएर गाउँघरमा पुग्छन्, खेतीपाती गर्छन् । आवश्यक पर्दा युटर्न लिएर पार्टी निर्णयलाई लागु गर्न अग्रस्थानमा देखापर्छन् । उनसँग के युवा के बृद्धबृद्धा सबै आकर्षित छन् । उनको चुनावी अभियानमा दैनिक पाँच सयभन्दा बढी मानिस प्रचार र घरदैलो अभियानमा छन् । उनको उम्मेदवारीमा सुनमा सुगन्ध थप्ने काम एकीकृत समाजवादीका उम्मेदवारले गरेका छन् । गठबन्धनमा एकीकृत समाजवादीका डिबी थापा उपाध्यक्षका उम्मेदवार हुन् । थापा अधिवक्ता हुन् । सरल, साहसी र पारदर्शी अध्यक्ष र कानूनमा पोख्त मिजासिला उपाध्यक्षको उम्मेदवार पाएकोले बलेफीवासी गठबन्धनतिर तानिएका छन् । गठबन्धन जिताउन सिन्धुपाल्चोकका लोकप्रिय युवा नेता माओवादी केन्द्रका केन्द्रीय सदस्य माधव सापकोटा सुवोध र अर्का केन्द्रीय सदस्य नेतृ अमृता नेपाल प्रभा जनताको घरआँगनमा पुगेका छन् ।