स्थापनाकाे ६२ औं वर्षमा राजेश्वरी

१९ भाद्र
इन्द्रावती ।
सिन्धुपाल्चोक इन्द्रावती गाँउपालिका वडा नं ७ सिपापोखरे स्थित राजेश्वरी माध्यमिक विद्यालय स्थापनाको ६१ बर्ष पुरा गरि ६२ औं बर्षमा प्रवेश गरेको छ । विद्यालय स्थापनाको साताब्यापी कार्यक्रमको अन्तिम दिन भाद्र १९ गते विद्यालयले ६१ औं बार्षिकोत्सव मूल समारोह आयोजना गरेको हो ।

बि.स. २०१९ साल भाद्र १९ गते स्थानीय समाजसेवीहरु रामबहादुर न्यौपाने, यमबहादुर ढुंगाना, छबिलाल सापकोटा, मेघनाथ न्यौपाने, शिबबहादुर सापकोटा लगायतको पहल र अगुवाईमा विद्यालय स्थापना भएको थियो । कक्षा १२ सम्म सञ्चालित सो विद्यालयमा बाल बिकास देखि कक्षा १२ सम्म कुल ३६७ जना छात्र छात्राहरु अध्ययनरत छन् । विद्यालयका प्रधानाध्यापक माधव प्रसाद सापकोटाले प्रस्तुत गर्नुभएको वार्षिक प्रगति प्रतिवेदनका अनुसार हाल विद्यालयमा कुल शिक्षक कर्मचारीको संख्या ३१ जना रहेको छ भने प्रति विद्यार्थी बार्षिक औषत खर्च रु. ५५ हजार हाराहारी रहेको छ ।

बागमती प्रदेशका भौतिक पुर्वाधार बिकास मन्त्री युवराज दुलाल शरदको प्रमुख आतिथ्यतामा सम्पन्न बार्षिकोत्सव मुल समारोहमा इन्द्रावती गाँउपालिका अध्यक्ष झम्कनाथ नेपाल, माओवादी केन्द्र बागमती प्रदेश सदस्य बीरबहादुर तामाङ, नेकपा (एमाले) इन्द्रावतीका अध्यक्ष एवं पालिका प्रवक्ता शशिनाथ आचार्य, नेपाली कांग्रेस इन्द्रावतीका सभापती जीवन थापामगर, वडा नं ४ का वडा अध्यक्ष क्षेत्रबहादुर तामाङ, वडा नं ७ का वडा अध्यक्ष रबिन्द्र कुमार खाती, वडा नं ८ का वडा अध्यक्ष दिलकुमार श्रेष्ठ, वडा नं ९ का वडा अध्यक्ष बाबुराम लामा, वडा नं १० का वडा अध्यक्ष रामचन्द्र घिमिरे र वडा नं ११ का वडा अध्यक्ष रामजी माझी लगायतको उपस्थिति रहेको थियो । समारोह शिक्षक प्रताप सिं तामाङको सञ्चालन र विद्यालय व्यवस्थापन समिति अध्यक्ष नेत्र बहादुर ढुंगानाको सभापतित्वमा सम्पन्न भएको थियो ।