जुरमुराउने प्रयासमा इन्द्रावतीकाे सहकारी अभियान : कलश र इन्द्रावती साना किसान बिचमा एकीकरण पहल शुरु

१२ चैत
नवलपुर, सिन्धुपाल्चोक ।
काेराेना महामारीको सन्त्रास पछि विश्वव्यापी आर्थिक मन्दि र त्यसले नेपाली अर्थतन्त्रमा पारेको प्रभावसंगै नेपालकाे सहकारी आन्दोलन समेत त्यसबाट अछुतो रहन नसकेको सन्दर्भमा इन्द्रावतीकाे सहकारी अभियानले अलिकति उठ्ने र जुरमुराउने प्रयास शुरु गरेको छ । पछिल्लो समय केही अवाञ्छित तत्व र बिशेष गरि सहकारीको मुल मर्म बिपरित सञ्चालनमा रहेका शहर केन्द्रित केही सहकारीमा देखिएको समस्याले सदस्य केन्द्रित र ग्रामीण सहकारीप्रति समेत नागरिकमा उदासीनता देखिएको अवस्थामा इन्द्रावती गाउँपालिकाका ठुला दुई सहकारीहरु कलश बचत तथा ऋण सहकारी संस्था लिमिटेड र इन्द्रावती साना किसान कृषि सहकारी संस्था लिमिटेड बिच एकीकरणकाे पहल शुरु भएको छ ।

२०६६ सालमा स्थापित कलश बचत तथा ऋण सहकारी संस्था र २०७४ सालमा स्थापित इन्द्रावती साना किसान दुवै संस्थाकाे कार्यक्षेत्र इन्द्रावती गाउँपालिकाका १२ वटै वडाहरु रहेका छन् भने दुबै संस्थामा करिब २ हजार २ सय शेयर सदस्यहरु रहेका छन् । दुबै संस्था बिच एकीकरणको लागि पदाधिकारी तहमा दुई चरणको छलफलपछि आज बसेकाे दुबै सहकारी संस्थाकाे सञ्चालक समितिकाे संयुक्त बैठकले ७ सदस्यीय एकीकरण कार्यदल गठन गरेको छ । कार्यदलले दुबै संस्थाकाे आवश्यक अध्ययन पछि कार्यसमितिकाे संयुक्त बैठकमा प्रतिवेदन पेश गर्ने र छलफल गरि सहमति भएमा आगामी आर्थिक वर्षबाट एकीकरण सहित संयुक्त काराेबार अगाडि बढ्नसक्ने कलश सहकारीका अध्यक्ष बुद्धिप्रसाद आचार्यले जानकारी दिए । त्यस्तै दुबै सहकारी संस्थाकाे संयुक्त बैठकले अन्य सहकारी संस्थाहरुलाई समेत एकीकरण र समायोजनका लागि आव्हान गरेको छ । बैठक साना किसानकाे मुख्य कार्यालय नवलपुरमा अध्यक्ष रामशरण गिरीकाे अध्यक्षतामा सम्पन्न भएको थियोे ।

त्यसैगरी आजै इन्द्रावती सहकारी सञ्जालकाे तर्फबाट इन्द्रावती गाउँपालिका समक्ष सहकारीका समस्या र स्थानीय सरकारले गर्नुपर्ने सहजीकरण सम्बन्धमा ध्यानाकर्षण गराइएको थियोे । इन्द्रावती सहकारी सञ्जालका अध्यक्ष रामशरण गिरी, सचिव बुद्धिप्रसाद आचार्य र काेषाध्यक्ष लक्ष्मीदेवी काेइरालाद्वारा हस्ताक्षरित ध्यानाकर्षण पत्र पालिका उपाध्यक्ष साेभना तामाङकाे राेहबरमा प्रमुख प्रशासकीय अधिकृत पुर्णप्रसाद दुलाल समक्ष हस्तान्तरण गरिएको थियोे । ध्यानाकर्षण पत्र बुझ्दै प्रमुख प्रशासकीय अधिकृत दुलालले सहकारीकाे विकास प्रति पालिका सरकार अति नै सकारात्मक र प्रतिबद्ध रहेको बताएका थिए ।

२०७४ सालमा निर्वाचित पहिलो स्थानीय सरकारकाे समय देखि नै गाउँपालिकाले सहकारीहरु बिच एकीकरण, समायोजन र शुद्धीकरणकाे प्रयास गरेपनि त्यसले मुर्तरुप लिन सकेको थिएन । झण्डै ४ वर्ष अघि सहकारी शाखा प्रमुख सुजाता गाैतमकाे पहल र तत्कालीन गाउँपालिका अध्यक्ष बंशलाल तामाङ समेतको उपस्थितिमा पालिका स्तरीय सहकारी सञ्जाल गठन भएपनि स्पष्ट कानुनको अभावमा अझै सञ्जालले कानुनी मान्यता पाउन सकेको छैन । वर्तमान गाउँपालिका अध्यक्ष झम्कनाथ नेपाल, प्रमुख प्रशासकीय अधिकृत, शाखा प्रमुख लगायतसंगकाे पटकपटकको भेटघाट र कुराकानी पछि सहकारी अभियान प्रति स्थानीय सरकार सकारात्मक रहे पनि संघिय कानुनमा रहेका केही अस्पष्टताले काम गर्न सहजता नभएको सञ्जालका अध्यक्ष रामशरण गिरीले बताए ।