७८ कराेडमै खुम्चियाे इन्द्रावतीकाे बजेट

नवलपुर, सिन्धुपाल्चोक ।
संघीय सरकार र प्रदेश सरकारबाट प्राप्त हुने अनुदान कम भएसंगै इन्द्रावती गाउँपालिकाकाे बजेट पनि खुम्चिएकाे छ । आज दाेश्राे गाउँ सभाकाे चाैथाे अधिवेशन मार्फत पालिका उपाध्यक्ष साेभना तामाङले आ.व. २०८०/८१ काे लागि गत आ. व. भन्दा झण्डै १७ कराेडले कम अर्थात करिब ७८ कराेड हाराहारीकाे अनुमानित संक्षिप्त्त बजेट वक्तव्य प्रस्तुत गरेकी छन् । प्रस्तावित बजेट मध्ये ८ कराेड घाटा बजेट रहेको छ । सभामा प्रस्तावित कुल ७८ करोड ४६ लाख ६७ हजार बजेट मध्ये १९ कराेड ३८ लाख ५५ हजार चालू खर्च र ५९ कराेड ८ लाख १२ हजार पुँजीगत खर्च अनुमान गरिएको छ । वडागत रुपमा वडा नं १ तथा वडा नं ४ लाई ७० लाख र बाँकी १० वटा वडाहरुलाई ६० लाखका दरले बजेट सिलिङ प्रस्ताव गरिएको छ । बजेटकाे पुर्णपाठ तथा कार्यक्रमकाे विस्तृत विवरण असारको अन्तिम साता प्रस्तुत हुनेछ ।

त्यस्तै आजकाे गाउँसभामा वडा नं ५ का वडा अध्यक्ष एवं पालिका प्रवक्ता शशिनाथ आचार्यले पालिकाकाे आ.व. २०८०/८१ काे नीति तथा कार्यक्रम पेश गरेका छन् । नीति तथा कार्यक्रमले ” सुखी र खुसी इन्द्रावती बासी – समृद्धिका लागि बिकासमा तिब्र गति” भन्ने नाराका साथ आर्थिक, सामाजिक र मानवीय संसाधनकाे बिकासमा जाेड दिएको छ । पुर्वाधार बिकास तर्फ इन्द्रावती चक्रपथ, हरेक वडा कार्यालय सम्म स्तरीय सडक, सम्पन्न हुन बाँकी वडा कार्यालयहरु सम्पन्न गर्ने, बाँकी बिद्यालय भवन, झाेलुङ्गे पुल निर्माण देखि हरित सडक र उज्यालो सडककाे अवधारणा समेत समेटिएको छ ।

पालिकाले नीति तथा कार्यक्रम मार्फत सामुहिक खेती, गाई भैसीमा नि: शुल्क कृतिम गर्भाधान, हरेक वडामा कृषि तथा पशुपालन पकेट कार्यक्रम सञ्चालन, सहकारी मार्फत अनुदानमा गाई भैंसी बितरण जस्ता महत्वाकांक्षी कार्यक्रम पनि घाेषणा गरेको छ । त्यस्तै हरेक दुई वडकाे बिचमा कम्तीमा एउटा मझौला उद्योग स्थापना, पालिका स्तरीय युवा परिषद गठन, वैदेशिक राेजगारीबाट फर्किएका युवा लक्षित कार्यक्रम लगायत बिषय नीति तथा कार्यक्रममा समेटिएका छन् । गाउँ सभा पालिका अध्यक्ष झम्कनाथ नेपालकाे अध्यक्षतामा सम्पन्न भएको थियोे ।