वडाध्यक्षका स्वतन्त्र उम्मेदवार हेम बस्नेतको महत्वाकांक्षी योजना

चौतारा साँगाचोकगढी नगरवासी हेम बस्नेत कुराभन्दा काम गर्ने व्यक्ति हुन् । बौद्धिक व्यक्तिले उनलाई योजनाकारको रुपमा मान्छन् । उनको बौद्धिकस्तरको चर्चा पनि गरिन्छ । जहिल्यै नयाँ–नयाँ काम गर्न रुचाउने बस्नेतको सरकारी उच्चपदस्थ अधिकारी, सेना, प्रहरी, नेता र विदेशी लगानीकर्तासम्म पहुँच छ ।
उनको स्वच्छता र सदाचारिताबाट मानिसले सिक्नसक्छन् । दलका उम्मेदवार भोट माग्न गाउँगाउँ पुगेका छन् । उनीहरुसँग पार्टीको केन्द्रीय नीति तथा कार्यक्रमबाहेक अरु केही नयाँ कार्यक्रम छैन । तर, उनले १४ बुँदे नीति र १८ बुँदे कार्यक्रम सार्वजनिक गरेका छन् । बस्नेत ६ नं. वडामा स्वतन्त्र उम्मेदवार छन् । उनको चुनाव चिह्न खरायो हो ।
वडाको विकासका लागि वडाका विशिष्ट व्यक्ति स्वदेश तथा विदेशी बित्तीय संस्थाबाट अनुदान र ऋण ल्याउने नीति छ । नीति सफल बनाउने उनको पहुँच पनि छ । वडामा प्राप्त हुने बजेटलाई बिउ पुँजी बनाउने, पाँच वर्षभित्र स्थानीयलाई विदेश जान नपर्ने बनाउने, उत्कृष्ट समाजवादको मोडेल तयार पार्ने, साझेदारी अवधारणाको विकास गर्ने नीति रहेको छ । हाम्रो गाउँ आफै बनाउँ, हर जन हर रोजगार भन्ने नारा दिएर बस्नेतले एक घर एक सदस्य, हरएक जनालाई सेयर दिएर सामुदायिक कम्पनी बनाएर यक्तिगत जमिनलाई लिजिङ गर्नेलगायत साझा तथा समानतामा आधारित नीति उनले सार्वजनिक गरेका छन् ।
बस्नेतले सार्वजनिक गरेको लोकप्रिय १८ बुँदे कार्यक्रममा २० जना सिभिल ओभरसियर, २० जना भेटेरीनरी जेटिए, २० जना कृषि जेटीए जम्मा ६० जनालाई पढाउने, पाँच लाख कटहर, ६ लाख कागती, बाँस र डालेघाँसको विरुवा उत्पादन र रोपन गर्ने, १३ वटा सिँचाइ पोखरी र दुई वटा रिजर्भ ड्याम बनाउने महत्वाकांक्षी कार्यक्रम छ । त्यसैगरी झ्याँडिखोलको पानी लिफ्ट गरेर गौराती पु¥याउने, प्लाइबोर्ड उद्योग स्थापना गर्ने, दुई सय मेघावाटको सोलार परियोजना बनाउने, गिदाने र पीपिलडाँडालाई तरकारीको पकेट क्षेत्र बनाउनेलगायत कार्यक्रम छन् । उनले ल्याएका नीति तथा कार्यक्रम लागु गर्न सकिने र यसबाट मोडेल वडा बनाउन सकिने भएकोले वडा नं. ६ का स्थानीय उत्साही भएका छन् ।