इन्द्रावती गाउँपालिकामा शेरबहादुर तामाङको घरदैलो अभियान सम्पन्न

सिन्धुपाल्चोक । नेकपा एमालेका उम्मेदवार शेरबहादुर तामाङले इन्द्रावती गाउँपालिकामा चुनावी घरदैलो अभियान सञ्चालन गरेका छन्। मङ्गलबार पालिकाको केन्द्र नवलपुरबाट सुरु भएको मतदाता भेटघाट कार्यक्रम अन्तिम दिन आज वडा नम्बर १, २ र ३ मा पुगेर सम्पन्न भएको हो।

घरदैलो अभियानका क्रममा तामाङले स्थानीय मतदातासँग प्रत्यक्ष भेटघाट तथा अन्तरक्रिया गर्दै उनीहरूका गुनासा र समस्या सुनेका थिए। स्थानीयवासीले विशेषगरी जंगली जनावर बाँदर, कँडेल तथा दुम्सीका कारण कृषि बालीमा ठूलो क्षति भइरहेको भन्दै दीर्घकालीन समाधानको माग गरेका छन्।

त्यस्तै, कच्ची सडकका कारण धुलो, हिलो र फोहोरको समस्या बढेको र यसले दैनिक जीवनमा गम्भीर असर पारेको स्थानीयको गुनासो छ। सवारी आवागमन, विद्यार्थीको विद्यालय आवतजावत तथा वृद्धवृद्धाको दैनिक गतिविधिमा कठिनाइ भइरहेको उनीहरूको भनाइ छ।

वडा नम्बर १० अन्तर्गतको विकट झोलुङ्गे बस्तीमा उम्मेदवार तामाङ पुगेपछि स्थानीयवासी उत्साहित र खुशी देखिएका थिए। लामो समयदेखि विकासका आधारभूत सुविधाबाट वञ्चित उक्त बस्तीका बासिन्दाले झोलुङ्गे बस्ती–बडहरे–नवलपुर मोटरबाटो स्तरोन्नतिको माग गरेका छन्। वर्षौंदेखि कच्ची र अप्ठ्यारो अवस्थामा रहेको सडकका कारण कृषि उपज ढुवानी, आवतजावत तथा आपतकालीन सेवामा समस्या भइरहेको उनीहरूको गुनासो छ।

स्थानीय प्रतिनिधिहरूले गाउँका महिला तथा युवालाई आत्मनिर्भर बनाउन सीपमूलक तालिम, साना उद्यम प्रवर्द्धन तथा आयआर्जनमूलक कार्यक्रम सञ्चालन गर्नुपर्नेमा जोड दिएका छन्। रोजगारीको अभावका कारण युवाहरू बाहिरिन बाध्य भएको भन्दै गाउँमै रोजगारी सिर्जना गर्न विशेष पहल आवश्यक रहेको उनीहरूको भनाइ छ।

स्थानीयको गुनासो सुनेपछि उम्मेदवार तामाङले स्पष्ट योजनासहित घरदैलोमा पुगेको बताउँदै उठेका समस्याहरू समाधान गर्ने प्रतिबद्धता व्यक्त गरेका छन्। विकास निर्माणका कामलाई प्राथमिकतामा राख्दै अधुरा पूर्वाधार योजनाहरू सम्पन्न गर्ने प्रतिवद्धता जनाउँदै उनले आफूलाई विजयी गराउन मतदातासँग आग्रह गरेका छन्।

घरदैलो अभियानका क्रममा इन्द्रावतीबासीबाट प्राप्त साथ, सहयोग र समर्थनले आगामी निर्वाचनमा आफ्नो जित सुनिश्चित हुने दाबी समेत उनले गरेका छन्।