जिल्लाभरि नै नेपाली काँग्रेसको पक्षमा व्यापक  माहोल निर्माण भएको छ–बालकृष्ण बस्नेत

          नेपाली कांगे्रसले  गत स्थानीय निर्वाचन २०७४ मा सजिलै जित्ने अपेक्षा गरेको बाह्रबिसे नगरपालिकामा अन्तत नेकपा (एमाले) संग नराम्ररी पराजित हुनुपरेको थियो । गत चुनावको पैंचो तिर्ने दाउमा रहेको नेपाली कांग्रेसका मेयर पदका प्रवल आकांक्षी बालकृष्ण बस्नेतसंग नयाँपानी खबरकालागी रामकृष्ण थापाले गरेको संवादको सम्पादित अंश  :

स्थानीय तह चुनावमा तपाइँको आकांक्षा रहेको पाइयो, यति महंगो चुनाव किन लड्न चाहनुहुन्छ ?

मैले चुनावमा महंगो संस्तोको जोडघटाउ गरेको छैन । म विकासको एजेण्डा लिएर चुनावमा जाने सोचाइमा छु । विकाससँगै भ्रष्टाचार न्यूनीकरण गर्ने मेरो एजेण्डा हुनेछ । साथै मेरो लागि चुनाव महंगो पनि हुँदैन । मसँग कसैले पनि पैसा माग्दैनन्  किनकि, मेरो नगरका सम्पूर्ण बासिन्दाको सुखदुःखमा मैले साथ दिएको छु । विकास, सुशासन र जनतालाई छिटो तथा छरितो सेवा दिने मेरा प्रतिवद्धता हुन् । तसर्थ, मेरा लागि चुनाव महंगो हुँदैन ।

तपाइँले टिकट पाउने आधार के–के हुन् ?

मेरो नगरमा दर्जनौं साथीहरु टिकट पाउन लायक हुनुहुन्छ । म सबैलाई सम्मान गर्छु ।  तर, म हिजोको घाइते तथा आजपनि पार्टीको क्षेत्रीय सभापति भएकोले मैले टिकट पाउने भन्दा पनि मै चुनाव लड्न उपयुक्त भनेर नगरका साथीहरुले मलाई नै दबाब दिइराख्नु भएको छ ।

टिकट पाउनुभयो भने चुनावी खर्च कसरी जुटाउनुहुन्छ ?

मैले माथि नै भनेँ म यो नगरको लागि चिनिएको व्यक्ति भएकोले मेरो क्षमताले थेग्नै नसक्ने खर्च लाग्दैन । धेरथोर मैले नै व्यवस्थापन गर्ने सोचेको छु । पार्टीको साथीहरु तथा शुभचिन्तकले मलाई साथ दिनुहुनेछ किनकि, म चुनाव लड्दै गर्दा म लड्ने भन्दा पनि पार्टी लड्ने भएकोले साथ सहयोग जुट्छ । निर्वाचनमा कृयाशील मेरो पार्टीका साथीहरुलाई म भोकै राख्दिन ।

जनमत माग्ने तपाइँको मार्गचित्र के–के हुन् ?

केन्द्रीय सरकारमै नेपाली जनताले हिजो नेकपालाई बहुमत दिँदा पनि सरकार चलाउन नसकेकोले पटकपटक संसद भंग गरेकोले नेपाली जनताले स्थिरता र विकास खोजेका छन् । म जनतालाई स्थिरता र विकास नेपाली काँग्रेसले मात्र दिनसक्छ भन्ने नारा दिएर जनताबीच जान्छु मैले टिकट पाएमा ।

तपाइँको पार्टी र अन्य प्रतिस्पर्धी दलको हालको अवस्था कस्तो छ ?

हिजो बाह्रबिसे नगर हामीले हारेका थियौं । नेकपाको टुटफुट, बामपन्थीको भूलभूलैयामा जनतालाई राख्ने रणनीतिको बाबजुद पनि आजका मितिमा मेरो क्षेत्र नम्बर १ मात्र नभै जिल्लाभरि नै नेपाली काँग्रेसको पक्षमा व्यापक  माहोल निर्माण भएकोले हामीले समग्र नगर तथा गाउँ हुँदै जिल्ला समन्वय समितिसमेत बनाउँछौं तपाइँको मिडियामार्फत म सिन्धुवासीलाई ढुक्क हुन आग्रह गर्दछु ।