मध्यपहाडी लोकमार्गकाे मादले भीरमा ब्रेकथ्रु : नागरिकलाई यातायातमा सहजता थपिने

बाहुनेपाटी ।
मध्यपहाडी लोकमार्ग अन्तर्गत बाहुनेपाटी–कोइरालाटार खण्डको मादले भीरमा सडक ब्रेकथ्रु भएको हो । यो सँगै दशैंअघि नै सो खण्डमा सार्वजनिक सवारी साधन सञ्चालन हुने भएको छ ।

साथै विगत २८ वर्षदेखि स्थानीयले साँघुरो बाटो, भीरको त्रास र इन्द्रावतीमा खस्ने जोखिम खेप्दै आएका नागरिकले सहज ढंगले आवतजावत गर्न पाउने भएका छन् । जोखिम मोलेर यात्रा गर्दा यस स्थानमा ४-५ जना नागरिकले ज्यान गुमाउनुपरेको थियो ।

यो सफलतासँगै अब राष्ट्रिय राजमार्गमा सहज पहुँच सम्भव भएको छ । परियोजनाका प्रस्तावक पूर्व प्रधानमन्त्री केपी शर्मा ओली, पहलकर्ता एमाले नेता तथा पूर्व मन्त्री शेरबहादुर तामाङ, साथै सिन्धुपाल्चोकका सक्रिय राजनैतिक दल र नेताहरुप्रति स्थानीयले आभार व्यक्त गरेका छन् ।

इन्द्रावती नदी तारेर बाँडेगाउँ, सिपापोखरे, भीमटार, भोटसिपा हुँदै बन्देउसम्म सहज यातायात सुविधा पुग्ने भएकाले यसले क्षेत्रको आर्थिक र सामाजिक विकासमा नयाँ गति थप्ने अपेक्षा गरिएको छ ।

यसबारे जानकारी दिँदै इन्द्रावती गाउँपालिका–५ का वडा अध्यक्ष शशिनाथ आचार्यले स्थानीयले अब, यातायातको दीर्घकालीन समस्याबाट मुक्त हुने विश्वास व्यक्त गरे ।