प्रगति मावि मेलम्चीको ३४ औँ वार्षिकोत्सव तथा प्रगति बाल उत्सव सम्पन्न

मेलम्ची।

प्रगति अंग्रेजी माध्यमिक विद्यालयको ३४ औँ वार्षिकोत्सव तथा प्रगतिवाल उत्सव सम्पन्न भएको छ । कार्यक्रम विविध शैक्षिक तथा सांस्कृतिक कार्यक्रमसहित भव्य रूपमा सम्पन्न भएको हो ।

समारोहका प्रमुख अतिथि मेलम्ची नगरपालिकाका प्रमुख आइतमान तामाङले कार्यक्रमको उद्घाटन गरेका थिए । उद्घाटन समारोहमा बोल्दै नगर प्रमुख तामाङले शिक्षालाई किताबी ज्ञानमा मात्र सीमित नराखी व्यवहारिक, अनुशासन र संस्कारसँग जोड्नुपर्नेमा जोड दिए । विद्यार्थीको सर्वाङ्गीण विकासका लागि शिक्षा, संस्कार र सीपलाई एकसाथ अघि बढाउनुपर्ने उनको भनाई थियो । प्रगति विद्यालयले शिक्षासँगै अतिरिक्त क्रियाकलाप र अनुशासनमा दिएको ध्यान प्रशंसनीय रहेको उनले बताए ।
कार्यक्रममा मेलम्ची नगरपालिकाकी उपप्रमुख उमा प्रधानले विद्यालयले बालबालिकाको प्रतिभा पहिचान गरी उजागर गर्ने वातावरण सिर्जना गरेको उल्लेख गरे ।

यस्ता बाल उत्सवले विद्यार्थीको आत्मविश्वास, नेतृत्व क्षमता र सिर्जनशीलता विकासमा ठूलो योगदान पु¥याउँने उपप्रमुख प्रधानको भनाई थियो । नगरपालिकाको तर्फबाट यस्ता शैक्षिक प्रयासलाई निरन्तर साथ रहने भन्दै प्रगतिले गरेका क्रियाकलाप अन्य सामुदायिक र निजि विद्यालयलाई समेत सिकाई हुने उपप्रमुख प्रधानले बताए ।

समारोह अन्तर्गत दीक्षान्त समारोह, कक्षोन्नति कार्यक्रम, कराते ग्रेडिङ, पुरस्कार वितरण तथा विद्यार्थीहरूद्वारा प्रस्तुत विभिन्न सांस्कृतिक कार्यक्रमहरू गरिएको विद्यालयका प्रिन्सिपल ऋषिराम नेपालले जानकारी दिए । कार्यक्रममा उत्कृष्ट शैक्षिक उपलब्धि हासिल गर्ने तथा अतिरिक्त क्रियाकलापमा सक्रिय विद्यार्थीहरूलाई सम्मान तथा पुरस्कार वितरण गरिएको थियो ।

विद्यार्थीहरूले प्रस्तुत गरेको नृत्य, गीत, तथा अन्य सांस्कृतिक प्रस्तुतीले कार्यक्रमलाई थप आकर्षक बनाएको थियो । विद्यालय अध्यक्ष विजयकृष्ण श्रेष्ठको अध्यक्षतामा भएको कार्यक्रममा शिक्षा शाखा प्रमुख लक्ष्मिप्रसाद रिजाल,अन्य विद्यालयका शिक्षक, अभिभावक,स्थानीयवासी तथा सरोकारवालाहरूको उल्लेखनीय सहभागिता रहेको थियो ।