सिन्धुपाल्चोक १ मा सुझाव संकलनसहित घरदैलोमा माधव सापकोटाको सक्रियता

सिन्धुपाल्चोक । सिन्धुपाल्चोक प्रतिनिधिसभा क्षेत्र नं. १ मा माधव सापकोटाले मतदाता भेटघाट अभियान सुरु गरेका छन्। नेपाली कम्युनिस्ट पार्टीका उम्मेदवार सापकोटाले लिसंखुपाखर गाउँपालिकाको पाखर बजारबाट अभियानको औपचारिक सुरुआत गरेका हुन्।

अभियानको उद्घाटनमा पूर्व सभामुख अग्निप्रसाद सापकोटासहित पार्टीका विभिन्न तहका नेताहरू सहभागी भएका थिए। स्थानीय बासिन्दा, युवा, महिला र विद्यार्थीहरूले डम्फु–झ्यालीसहित नाराबाजी गर्दै उम्मेदवारलाई स्वागत गरेका थिए।

पाखरबाट सुरु भएको अभियानमा निर्वाचन परिचालन संयोजक केशव नेपाल, बागमती प्रदेशसभा सदस्य सरल सहयात्री र अमृता नेपाल, बाह्रबिसे नगरपालिकाका पूर्व मेयर निम्फुन्जो शेर्पा तथा पूर्व सांसद सिंहबहादुर बिकलगायतको उपस्थिति रहेको थियो।

ठूलो पाखरमा आयोजित कोणसभामा सापकोटाले आफ्नो अघिल्लो छोटो कार्यकालमा गरेका कामहरूको समीक्षा गर्दै अधुरा योजना पूरा गर्न पूर्ण कार्यकालको अवसर दिन मतदातासँग आग्रह गरे। स्वास्थ्य, शिक्षा, सडक, पर्यटन, कृषि र रोजगारीका क्षेत्रमा नयाँ योजना अघि सार्दै उनले जनताका सुझाव संकलनलाई अभियानको मुख्य उद्देश्य बनाइएको बताए।

पाखर बजारदेखि आसपासका टोल–गाउँमा पुगेका सापकोटाले महिला, युवा, किसान र ज्येष्ठ नागरिकसँग प्रत्यक्ष संवाद गर्दै सुझाव संकलन गरेका थिए।