अन्ततः नयाँपानीमा पानी पलायो

बाँडेगाँउ, इन्द्रावती ।
सिन्धुपाल्चोक जिल्लाकाे इन्द्रावती गाउँपालिका वडा नं ५ स्थित नयाँपानी धाममा आज माघ १६ गते पानी पलाएको छ । परापुर्व कालदेखि हरेक १२ वर्षको अन्तरालमा हिउँदकाे समयमा पानीको मुल पलाएर वर्षायाममा सुक्ने र त्यसको १२ वर्षपछि हिउँदे याममा पानीकाे मुल पलाउने यहाँको अद्भुत बिशेषता रहेको छ ।

यसअघि २०६८ सालको कार्तिक अन्त तिर पलाएको पानी २०६९ साल असारमा सुकेको थियोे । प्रचलन अनुसार गत वर्षकाे हिउँदमा पानी पलाउनु पर्थ्याे तर पलाएन । गाउँका बासिन्दा चिन्तित बने । कसैले ७२ सालको महा भुकम्पलाई दाेष दिए । कसैले ७२ सालमा पञ्चकन्याबाट गराइएको वैदिक महायज्ञलाई दाेष लगाए । गत वर्ष भगवान रिसाएको हाे कि ? भन्ने बुढापाका र धार्मिक गुरुहरुकाे सल्लाह अनुसार गाउँले सबै मिलेर क्षमापुजा समेत गरियो तर पनि पानीको अत्तोपत्तो भएन । काेहि धार्मिक अनुयायी र सन्तकाे शरिरमा देवी आएर नाग देवता रिसाएको भन्ने पनि सुनियो र गत नागपञ्चमीमा नाग देवता स्थापना गरेर पुजाआजा समेत गरियो । त्यति गर्दागर्दै पनि पुस सम्म पनि पानीको मुल नपलाएपछि सबै बासिन्दाले आशा मारिसकेका थिए ।

तर आज सबैलाई चकित पार्दै माघ १६ गते औशीका दिन नयाँपानी धाममा नयाँपानीको मुल पलाएको छ । संयाेग नै मान्नुपर्छ यसअघि पनि साे स्थानमा औशीकै दिन पानीको मुल फुटेको थियोे । आज स्थानीय बासिन्दा असाध्यै हर्षित भएका छन । काेहि भगवानकाे शक्ति भनेर पुलकित छन भने काेहि प्रकृतिको अद्भुत नजारालाई सलाम गरिरहेका छन ।