निरासा ताेड्दै समाजवादकाे यात्रा तय गर्छाैं : गंगा बहादुर तामाङ “प्रवेश ” अध्यक्षका उम्मेदवार माओवादी केन्द्र , बलेफी

१६ वैशाख, नौविसे ।
नेपाल कम्युनिष्ट पार्टी (माओवादी केन्द्र) बलेफी गाउँपालिकाका अध्यक्ष पदका उमेदवार गंगा बहादुर तामाङ प्रवेशले पार्टीको जितले अरुले व्यवस्थाप्रति पैदा गरेको निरासता चिर्दै समाजवादको यात्रातर्फ लैजाने निश्चित भएको बताउनु भएको छ ।
गृह गाउँपालिका बलेफीको वडा नं २ को नौविसे, माझिबस्ती, ढाँडेखोला, कामिटार, झोलंगे, भुजुंगे, बस्नेत गाउँ, फुल्पिङ, तल्लो कल्लेरी, विस्टेस्वाँरा, पौडेलगाउँ लगायतका बस्तीहरुमा आज घरदैलको क्रममा उमेदवार तामाङले सो कुरा बताउनु भएको हो । घर दैलोका क्रममा उहाँले माओवादीले पालिकाको नेतृत्व गर्ने अवस्था नहुँदा जनयुद्ध र जनआन्दोलनको संयोजनबाट भएको परिवर्तित व्यवस्था अनुसार अवस्था परिवर्तन हुन नसकेको उल्लेख गर्नु भयो । माओवादी बाहेक अरुले नेतृत्व परिवर्तन सम्भव नभएको र यो कुरा स्थानीय तहको पहिलो कार्यकालबाट प्रमाणित नै भइसकेको छ भन्नु भयो । उहाँले गाउँ गाउँमा विभेद सृजना गरिएकोले अरु पार्टीको नेतृत्व हुँदा पालिकाले उन्नतीको सट्टा झन अधोगति हुने निश्चित भएको तर्क गर्नु भयो ।
युवा उमेदवार तामाङले यसपटक व्यवस्था बदल्न मुख्य भूमिका खेलेको माओवादी केन्द्रलाई विजयी गराउन सबैमा आग्रह गर्नु भयो । बलेफी गाउँपालिका भित्रका किसान, मजदुर, महिला, दलित, जनजातिलगायत सबैका पक्षमा काम गर्न र विकास निर्माणका लागि आधार तय गर्न माओवादी मात्रै सक्षम रहेको उहाँको भनाई छ । वैशाख ३० गते हुने स्थानीय तह निर्वाचनमा आफ्नो अमूल्य मत दिएर बिजयी गराए बलेफी गाउँपालिका भित्रका बासिन्दाले आफैंले आफैंलाई गर्व गर्ने अवस्था सृजना हुने उहाँले विश्वास व्यक्त गर्नु भयो । उहाँले माओवादीले जिते जनमतको कदर हुने र पालिका बासीको शिर निहुरिन नदिने प्रतिवद्धता व्यक्त गर्नु भयो । उहाँले यस पटक काम गरेर देखाउने अवसरको लागि पालिका बासिको अमूल्य मत सहितको न्याय हुने विश्वास व्यक्त गर्नु भयो ।
बलेफी गाउँपालिकामा माओवादी र समाजवादीबीच गठबन्धन भएको छ। गठबन्धनबाट उपाध्यक्षमा एकिकृत समाजवादीका डिबी थापाको उमेदवारी छ । घरदैलोका क्रममा थापाले जनताको सेवामा खटिरहेको र खटिरहने प्रतिवद्धता व्यक्त गर्नुभयो । घरदैलोका क्रममा स्थानीय बासीले अघिल्लो पटक प्राविधिक कारण माओवादीले हार व्यहोरेको बताउँदै यस पटक माओवादीलाई जिताएरै छाड्ने प्रतिवद्धता व्यक्त गर्नु भएको थियो ।                                                                   
घर दैलोका क्रममा बलेफी गाउँपालिका २ का उमेदवार पुरुषोत्तम सापकोटाले वडा र पालिकामा माओवादीको जितले मात्रै विकास निर्माण सहित जनताका माग सम्बोधन गर्न सकिने अवस्था आउने छ भन्नु भयो । बलेफी २ मा अध्यक्षमा सापकोटा सहित सदस्यहरुमा यम बहादुर पौडेल, अर्जुन बहादुर भण्डारी, महिला सदस्य सावित्री माझी र दलित महिला सदस्य मिना वि क. उमेदवार रहेनु भएको छ । बलेफी गाउँ पालिका वडा नं २ माओवादीको आधार क्षेत्र रहेकोले सबैभन्दा बलियो र सशक्त अवस्थामा रहेको दावी सो पाटीको छ । कुल १ हजार ५ सय ४३ जना मतदाता रहेको सो वडामा चुनावी अभियानले जिल्लास्तरमा चर्चा पाएको छ ।