रास्वपाकाे आकस्मिक बैठक , रविकाे गृहमन्त्री हुने सम्भावना न्युन

२१ माघ , काठमाडौं ।
राष्ट्रिय स्वतन्त्र पार्टीको केन्द्रीय कमिटी तथा संसदीय समितिकाे आकस्मिक बैठक काठमाडौंमा हुन लागिरहेको छ । सत्ता गठवन्धनमा भएको सहमति अनुसार गृहमन्त्रालय नै पार्टीलाई दिन प्रधानमन्त्रीलाई दिएको अल्टिमेटम आज सकिएकोले सरकारमा रहने वा बाहिरिने भन्ने बिषयमा निर्णय गर्न साे आकस्मिक बैठक बाेलाइएकाे जनाइएको छ । बैठक पार्टीको केन्द्रीय कार्यालयमा अहिले साँढे आठ बजेपछि बस्ने एक केन्द्रीय सदस्यले जानकारी दिए ।

बिशेष सुत्रका अनुसार प्रधानमन्त्री प्रचण्ड र एमाले अध्यक्ष केपी शर्मा ओलीले राष्ट्रिय स्वतन्त्र पार्टीलाई गृह बाहेकको अन्य मन्त्रालय राेज्न र रवि लामिछाने भन्दा अर्को व्यक्ति चयन गर्न प्रस्ताव गरेको बुझिएको छ । फरक व्यक्ति र फरक मन्त्रालय लिएर सरकारमा रहने कि सरकारबाट बाहिरिने भन्ने निर्णय लिन संयुक्त बैठक बस्न लागेको बताइन्छ । बहुमत केन्द्रीय सदस्य र सांसदहरूकाे सरकारबाट बाहिरिन नहुने मत रहेकोले साेही अनुसारको निर्णय हुनसक्ने एक केन्द्रीय सदस्य बताउँछन् । अब रविकाे गृह मन्त्रालय फर्कने चाहना भने अधुरै रहने पक्का जस्तै भएको छ ।