बागीकाे बिगबिगी

माओवादी केन्द्रमा आवद्ध तीन जनाले पार्टी छोडेर स्वतन्त्रबाट उम्मेदवारी दिएका छन् । चौतारा साँगाचोकगढी नगरपालिका निवर्तमान मेयर अमानसिंह तामाङ, भोटेकोसी गाउँपालिका–२ का वडाध्यक्ष दीपेन्द्रकुमार श्रेष्ठ र पार्टी सदस्य हेम बस्नेतले स्वतन्त्रबाट उम्मेदवारी दिएका हुन् । त्यसैगरी नेपाली काँग्रेसका नेता जिमी लामाले पनि स्वतन्त्रबाट उम्मेदवारी दिएका छन् ।

तामाङले चौसाँगढी नगरको मेयरमा उम्मेदवारी दिएका हुन् । मेयरमा दोहो¥याउने आकांक्षा राखेका तामाङले एक महिनादेखि मेयरको दाबी गरिरहेका थिए । यद्यपि, पार्टी कमिटीको बहुमतले उनलाई अस्विकार गरेको थियो । मेयरको टिकट लिन पार्टी अध्यक्ष प्रचण्डकहाँ तीनपटक धाए । तामाङले टिकटका लागि एमाले र काँग्रेससँग पनि छलफल गरे । अन्ततः कतैबाट टिकट नपाएकोले स्वतन्त्रबाट उम्मेदवारी दर्ता गराएका छन् । उनी माओवादी केन्द्रको वागमती प्रदेश सदस्यसमेत हुन् । बागी उम्मेदवारी फिर्ता नगरे साधारण सदस्यबाट समेत निष्कासन गर्ने पार्टीको चेतावनी छ । पार्टी केन्द्रीय सदस्य सहिद शुभद्राकी बुबा कृष्णप्रसाद सापकोटा माओवादीबाट चुनावी मैदानमा छन् ।

त्यसैगरी चीनसँगको सीमाना जोडिएको भोटेकोसी गाउँपालिका प्रमुखमा दिपेन्द्र कुमार श्रेष्ठले उम्मेदवारी दिएका छन् । ०७४ को स्थानीय चुनावमा उनले वडा नं. २ बाट चुनाव जितेका थिए । एमाले–माओवादी गठबन्धन भएको प्रदेश र संघीय चुनावमा श्रेष्ठ निर्वाचन परिचालन कमिटीका प्रमुख थिए । उनलाई माओवादी केन्द्रका भोटेकोसी इन्चार्ज आङ्छिरी शेर्पा, अध्यक्ष लाक्पा शेर्पा, निवर्तमान गाउँपालिका उपप्रमुख दाबुटी शेर्पालगायत सयभन्दा बढीको समर्थन छ । निवर्तमान अध्यक्ष राजकुमार पौडेलले दोहो¥याएर टिकट पाएपछि माओवादीमा आबद्ध सयभन्दा बढीले राजीनामा दिएर स्वतन्त्र उम्मेदवार श्रेष्ठलाई समर्थन गरेका हुन् ।

माओवादीका सक्रिय कार्यकर्ता हेम बस्नेतले पनि चौतारा साँगाचोकगढी नगरपालिका –६ बाट वडाध्यक्षमा स्वतन्त्र उम्मेदवारी दिएका छन् । काँग्रेस नेता जिमी लामाले निवर्तमान अध्यक्ष निमा ग्याल्जेन शेर्पाविरुद्ध बागी उम्मेदवारी दिएका छन् ।