जनयुद्धका नेता जिमी लामा माओवादीमा समाहित

नयाँपानी खबर

काठमाडौं

इन्द्रावती गाउँपालिका–१ छहरे निवासी युवा नेता जिमी लामा विश्व माओवादी केन्द्रमा समाहित भएका छन् । लामा संलग्न पार्टी नेपाल लोकतान्त्रिक जनता काँग्रेसका अध्यक्ष जितबहादुर चौधरीसहित सयौं नेताकार्यकर्ता पार्टी समायोजन प्रक्रियामार्फत् माओवादी केन्द्रमा समाहित भएका हुन् । पार्टीका वरिष्ठ नेता कृष्णबहादुर महराले लामासहितलाई पार्टीमा स्वागत गरेका छन् । लामाका अनुसार उनी माओवादी केन्द्रको केन्द्रीय सदस्य भएका छन् ।

को हुन् लामा ?

विश्व नामले परिचित जिमी लामा दश वर्षे जनयुद्धका कमाण्डर हुन् । उनले पार्टीभित्र थुप्रै महत्वपूर्ण काम गरे । धेरैलाई जनयुद्धमा सामेल गराए । उनले भूमिगत गराएका कयौ सहिद भए । तर, उनी आफै चाहिँ पार्टी छोडेर राजधानी भासिए ।

पार्टीभित्र लामा प्रभावशाली मानिन्थे । योजना निर्माणमा कुशल व्यक्ति भएकोले व्यवस्थापनको प्राय जिम्मेवारी उनले सम्हाल्थे । उनको वाक क्षमता र माक्र्सवादी प्रशिक्षणले युवायुवती प्रभावित हुन्थे । जनयुद्धको चरम्संकटका बेला उनको भूमिका महत्वपूर्ण थियो । जिल्ला सदरमुकाम चौतारा आक्रमणपूर्व लामा एकाएक पार्टीबाट पलायन भएर राजधानीमा लुकेर बसे । तर, पार्टीलाई उनले भित्रीरुपमा सहयोग गरिरहे ।

शान्ति प्रक्रियाको सुरुवातपछि उनी पनि सार्वजनिक भए र पार्टीलाई सहयोग गरे । पहिलो संविधानसभा चुनावमा पार्टीलाई जिताउन तत्कालीन १२ नं इलाका हालको पाँचपोखरी थांपाल गाउँपालिकामा रहेर योगदान गरे । तर, केही समयपछि पशुपति शम्शेर राणासँग नजिकिएर राप्रपामा राजनीति गरे । त्यहाँ पनि उनी सिन्धुपाल्चोकको २ नं क्षेत्रीय सभापति भए । उनको राजनीतिमा धेरै उतारचढाब आयो । उनले विभिन्न पार्टीको राजनीति गरे । राजनीतिक कार्यक्रम बनाउन र मानिसलाई छिट्टै प्रभावमा पार्नसक्ने क्षमता भएकोले लामाले विभिन्न पार्टी स्थापना गरेर सामाजिक मुद्दालाई मुखरित गरिरहे । केही वर्षदेखि लामा नेपाल लोकतान्त्रिक जनता काँग्रेस पार्टीमा आवद्ध थिए । उनको माओवादी केन्द्रको अबको यात्रा निकै प्रभावकारी हुने मानिएको छ । पूर्वमन्त्री युवराज दुलालसँग रहेर पार्टी हाँक्न तयार भएका लामाले २ नं संघीय क्षेत्रमा विपक्षीलाई धक्का दिनेछन् । लामासँग युवापंक्ति आकर्षित छ ।