प्रगतितर्फ उन्मुख सिन्धुपाल्चोक उद्योग वाणिज्य संघको वर्षे कार्यकाल

उद्योग, व्यापार, कृषि र पर्यटन क्षेत्रमा योगदान पु¥याउँदै आएको सिन्धुपाल्चोक उद्योग वाणिज्य संघको एक वर्षे कार्यकाल पूरा भएको छ । छोटो अवधिमा सिउवासंघले केही प्रगतिउन्मुख कार्यक्रम पनि सम्पन्न गरेको छ ।
संघले व्यापारमात्रै होइन कृषि क्षेत्रलाई प्राथमिकता दिएर किसानलाई सीपमूलक तालिम प्रदान गर्ने तयारी गरेको छ । ‘स्थानीय तहको निर्वाचन लगत्तै हामी किसानका लागि नगद कमाउने कार्यक्रम लिएर आउँछौं,’ सिन्धुपाल्चोक उद्योग वाणिज्य संघका अध्यक्ष राजकुमार बस्नेत (होमबहादुर) ले भने ।
एक वर्षे अवधिमा संघले नियमित कार्यक्रमबाहेक बाढिपहिरोबाट पीडितको उद्धार र राहत तथा कोरोना भाइरस महाब्याधी नियन्त्रणका लागि योगदान गरेको छ । कोभिड–१९ रोकथामका लागि संघले जिल्लाभर विभिन्न समुदाय र अस्पतालमा २५ लाख बराबरको स्वास्थ्य सामग्री प्रदान गरेको छ । हिमालय सीमापार वाणिज्य संघसँग मिलेर मेलम्ची, लिदी, नागपूजे, जम्बु र भोटेकोसी क्षेत्रमा बाढीपहिरोबाट पीडित भएका स्थानीयलाई पोलार, खाद्यान्न सेट, त्रिपाललगायत सामग्री वितरण गरेको थियो । अध्यक्ष बस्नेतले दिएको जानकारीअनुसार ४५ लाख बराबरको सामग्री बाढीपहिरोपीडितलाई वितरण गरिएको हो ।
तातोपानी, रसुवा र भारत हुँदै सामुद्रिक बन्दरगाहबाट आयात हुने चिनियाँ सामानलाई सहजढंगले ट्रान्सपोर्ट र ढुवानी गर्न संघले समन्वयकारी भूमिका निभायो । भूकम्पपछि खुलेको तातोपानी नाका सहजीकरणका लागि संघले पटकपटक भूमिका निर्वाह गरेको छ । ‘हामीले प्रधानमन्त्री, सभामुख, परराष्ट्रमन्त्री र सम्बन्धित मन्त्रालय र विभागसम्म पुगेर पटकपटक ज्ञापनपत्र बुझायौ,’ बस्नेतले भने, ‘चिनियाँ विदेशमन्त्री तथा स्टेट काउन्सिलर वाङ यी आउने अघिल्लो दिन पनि परराष्ट्रमन्त्री डा.नारायण खड्कालाई भेटेर तातोपानी नाकाको वर्तमान अवस्थाबारे जानकारी दिएका छौं ।’ तर, अन्तर्राष्ट्रिय नाका सुरक्षाको संवेदनशीलता भएकोले नाका सहज हुन समय लाग्ने उनले सुनाए ।
सिन्धुपाल्चोक उद्योग वाणिज्य संघले स्थानीय तहसँग सहकार्य गरेर किसानलाई उपलब्ध गराउने उपकरण र तालिम भने हाललाई स्थगित गरिएको छ । स्थानीय तहको निर्वाचनपछि गठन हुने कार्यपालिकासँग थप छलफल गरेर कार्यक्रमलाई अगाडि बढाउने संघको योजना छ । व्यापार, उद्योग र कृषिलाई महत्व दिने योजना बनाएको संघले एक वर्षे अवधिमा प्रगतितर्फ लम्कने काम गरेको उद्योगी, व्यवसायी बताउँछन्