दोस्रो वडाध्यक्ष कप भलिबल प्रतियोगितामा प्रतिस्पर्धा तीव्र: वडा ५ र ७ बीच उपाधि भिडन्त हुने

नवलपुर । इन्द्रावती गाउँपालिका वडा नम्बर ५ को आयोजनामा जारी दोस्रो वडाध्यक्ष कप भलिबल प्रतियोगितामा वडा नम्बर ५ र ७ फाइनलमा पुगेका छन् ।

मंगलबारबाट सुरु भएको प्रतियोगितामा आज सम्पन्न सेमिफाइनल खेलमा वडा नम्बर ५ ले वडा नम्बर ४ लाई र वडा नम्बर ७ ले वडा नम्बर ८ लाई पराजित गर्दै फाइनलमा स्थान सुरक्षित गरेका हुन् । तेस्रो स्थानका लागि भएको खेलमा वडा नम्बर ४ ले वडा नम्बर ८ लाई २६–२४ र २५–२० ले पराजित गर्दै तेस्रो स्थान हासिल गरेको छ ।

प्रतियोगितामा पालिका भरिका ९ टोलीले सहभागिता जनाएको थियो । खेलकुदमार्फत स्वास्थ्य प्रवद्र्धन गर्नुका साथै युवालाई खेलतर्फ आकर्षित गर्ने उद्देश्यले आयोजना गरिएको प्रतियोगितामा प्रथम हुने टोलीले ४० हजार रुपैयाँ, दोस्रो हुने टोलीले २५ हजार रुपैयाँ र तेस्रो हुने टोलीले १५ हजार रुपैयाँसहित ट्रफी, मेडल तथा प्रमाणपत्र प्राप्त गर्ने आयोजकले जनाएको छ ।

फाइनल खेल भोलि बिहान साढे ७ बजे सुरु हुने वडा नम्बर ५ का अध्यक्ष तथा गाउँपालिका प्रवक्ता शशीनाथ आचार्यले जानकारी दिनुभयो ।