क्षेत्र नं. २ मा रोजगारी र सन्तुलित विकासको एजेन्डा बोकेर मैदानमा बंशलाल तामाङ

सिन्धुपाल्चोक । सिन्धुपाल्चोक प्रतिनिधिसभा क्षेत्र नं. २ मा बंशलाल तामाङको चुनावी अभियान युवामुखी एजेन्डासहित अघि बढिरहेको छ। नेपाली कांग्रेसका तर्फबाट उम्मेदवार बनेका तामाङको पक्षमा विभिन्न नगरपालिका र गाउँपालिकाका युवाहरू सक्रिय रूपमा संगठित हुन थालेका छन्।

युवा भेलालाई सम्बोधन गर्दै तामाङले सन्तुलित विकासलाई केन्द्रमा राखेर क्षेत्रको समग्र रूपान्तरण गर्ने योजना अघि सारेका छन्। हेलम्बु गाउँपालिका र पाँचपोखरी थाङपाल गाउँपालिकालाई “अर्गानिक भ्याली”का रूपमा विकास गरी कृषि, पर्यटन र स्थानीय उत्पादनमार्फत युवालाई रोजगारी सिर्जना गर्ने योजना रहेको उनले बताए। पाँच वर्षभित्र ठोस विकास योजना कार्यान्वयन गरी क्षेत्र नं. २ लाई नमूना क्षेत्र बनाउने प्रतिबद्धता उनले व्यक्त गरे।

कार्यक्रममा कांग्रेस केन्द्रीय सदस्य शिव सुनारले पार्टीभित्र सुधारको प्रक्रिया सुरु भइसकेको दाबी गरे। तामाङले इन्द्रावती गाउँपालिकाको नेतृत्व गर्दा इमान्दार रूपमा काम गरेको उल्लेख गर्दै उनले अब विदेशबाट फर्किएका युवाको सीपलाई विकासमा प्रयोग गर्ने वातावरण बनाउनुपर्ने बताए।

त्यस्तै, कांग्रेसका पूर्व जिल्ला सचिव बिलबहादुर तामाङले युवालाई राजनीतिक रूपमा सचेत हुन आग्रह गरे। अमृत खनालले मेलम्ची नगरपालिकामा कांग्रेस विजयी भएपछि विकासले गति लिएको दाबी गरे। कार्यक्रममा युवा नेता भिम बिकले तामाङको पक्षमा सक्रिय रूपमा अभियान चलाउने प्रतिबद्धता जनाए।