प्राकृतिक स्रोत र पूर्वाधार विकासमा जोड दिँदै सरेश नेपालको बाचा पत्र सार्वजनिक

सिन्धुपाल्चोक । निर्वाचन नजिकिँदै जाँदा दलहरूले आफ्ना एजेण्डा सार्वजनिक गर्न थालेका छन् । हालसम्म केही दलले बाहेक केन्द्रीय घोषणा पत्र अझै सार्वजनिक गरेका छैनन् । नेकपा एमालेका तर्फबाट सिन्धुपाल्चोक–१ का उम्मेदवार सरेश नेपालले भने क्षेत्र केन्द्रित बाचा पत्र अघि सारेका छन् ।

‘सपना, बुझाइ र संकल्प’ शीर्षकमा प्रस्तुत बाचा पत्रले स्थानीय आवश्यकता र सम्भावनालाई प्राथमिकता दिएको छ। जुगल हिमाल, नदी तथा तातोपानी धारा जस्ता प्राकृतिक स्रोतको सदुपयोग गरी आर्थिक गतिविधि बढाउने, तातोपानी नाका र अरनिको राजमार्गलाई व्यवस्थित बनाउने तथा ग्रामीण सडक सञ्जाल सुदृढ गर्ने योजनालाई मुख्य आधार बनाइएको छ ।

युवालाई गुणस्तरीय शिक्षा र स्वदेशमै रोजगारी, स्वास्थ्य सेवालाई सर्वसुलभ बनाउने प्रतिबद्धतासहित नेपालले स्वच्छ छवि र सेवाभावलाई आफ्नो राजनीतिक आधार मान्ने बताएका छन्। केन्द्रीय घोषणा पत्र आउनुअघि नै स्थानीय भूगोल र जनअपेक्षालाई केन्द्रमा राखेर बाचा पत्र सार्वजनिक गरिएको उनको भनाइ छ ।