खड्कुले झरनामा राष्ट्रिय झन्डोत्तोलन

पाँचपोखरी थाङपाल गाउँपालिकाको महत्वपूर्ण धार्मिक तथा सांस्कृतिक तपोभूमि वडा नं २ स्थित खड्कुले झरना परिसरमा आज राष्ट्रिय झण्डोत्तोलन कार्यक्रम सम्पन्न भएको छ । कार्यक्रम गाँउपालिका अध्यक्ष टासी लामाको प्रमुख आतिथ्यतामा, गाउँपालिका उपाध्यक्ष सुनिता अधिकारीको विशेष आतिथ्यतामा तथा वडा अध्यक्ष बाबुलाल स्याङ्बोको अध्यक्षतामा सम्पन्न भएको हो ।

कार्यक्रममा खड्कुले झरना गाउँपालिकाको पहिचान, गौरव र पर्यटन सम्भावनाको केन्द्र बन्दै गएको उल्लेख गर्दै यसको संरक्षण र पर्यटन प्रवर्द्धनका लागि सबै सरोकारवालाहरू एकजुट हुनुपर्नेमा जोड दिइएको छ । “राम्रो खड्कुले झरना, सुन्दर खड्कुले झरना” अभियानलाई सफल बनाउन सामूहिक प्रयास आवश्यक रहेको बताएको छ ।

छोटो समयमै मिङमार गोलेको अध्यक्षतामा गठन भएको उपभोक्ता समितिले गरेको काम प्रशंसायोग्य रहेको भन्दै समितिप्रति अध्यक्ष लामाले धन्यवाद व्यक्त गरे । साथै वडा र गाउँपालिकाबीचको साझेदारीमा खड्कुले झरनालाई हेर्न लायक तथा घुम्न योग्य पर्यटकीय गन्तव्य बनाउने प्रतिबद्धता व्यक्त गरिएको छ ।

अध्यक्ष लामाले कार्यक्रम सफल बनाउन सहयोग र सहभागिता जनाउने सबैलाई आयोजकले हार्दिक धन्यवाद व्यक्त गरे ।