पौष १७ मा छैठौँ जलवायु सम्मेलन आयोजना हुने

मेलम्ची । मेलम्ची नगरपालिकाको आयोजनामा जलवायु सम्मेलन २०८२ हुने भएको छ। सम्मेलनमा बागमती प्रदेश सरकारका मुख्यमन्त्री इन्द्रबहादुर बानिया प्रमुख अतिथिको रूपमा सहभागी रहनेछ ।
सम्मेलनमा बागमती प्रदेश सरकारका आर्थिक मामिला तथा योजना मन्त्री माननीय प्रभात तामाङ, खानेपानी, ऊर्जा तथा सिँचाइ मन्त्री कृष्णकुमार तामाङ, स्वास्थ्य मन्त्री किरण थापा र वन तथा वातावरण मन्त्री भरतबहादुर केसीको विशेष आतिथ्य रहने कार्यक्रम  छ।

कार्यक्रममा जिल्ला समन्वय समितिका प्रमुख तथा उपप्रमुख, सिन्धुपाल्चोक जिल्लाभित्रका १२ वटै स्थानीय तहका प्रमुख तथा उपप्रमुख, छिमेकी जिल्लाका स्थानीय तहका जनप्रतिनिधि, साथै जिल्लास्थित सरकारी निकायका प्रमुख, सुरक्षा निकायका प्रमुख तथा विभिन्न सरोकारवाला निकायका प्रतिनिधिहरूको सहभागिता रहने बताइएको छ।

मेलम्ची नगरपालिकाको आयोजनामा हुने सम्मेलनमार्फत जलवायु परिवर्तनका असर, स्थानीय विकास, कृषि, पर्यटन, उद्योग र जलाधार संरक्षणका विषयमा गहन छलफल गरिने आयोजकले जनाएको छ।

कार्यक्रममा सरोकारवाला निकाय, विज्ञ, जनप्रतिनिधि तथा सर्वसाधारणको सहभागिताका लागि आयोजकले आह्वान गरेको छ।