मेलम्ची आयोजनाको सहमति तत्काल कार्यान्वयनमा, सडक स्तरोन्नति टेन्डर आह्वान

मेलम्ची । मेलम्ची खानेपानी आयोजनासम्बन्धी मंगलबार भएको सहमति आजै कार्यान्वयनमा आएको छ। सहमति भएको २४ घण्टाभित्रै मेलम्ची खानेपानी आयोजनाको मुहान क्षेत्र (हेडवर्क्स) पुग्ने सडक स्तरोन्नतिका लागि टेन्डर आह्वान गरिएको हो।

ऊर्जा, जलस्रोत तथा सिँचाइ, भौतिक पूर्वाधार तथा यातायात र सहरी विकास मन्त्री कुलमान घिसिङको उपस्थितिमा मंगलबार खानेपानी मन्त्रालय र सरोकार समितिबीच भएको सहमति अनुसार सडक सुधार कार्य अघि बढाइएको हो। उक्त सहमतिअनुसार चरिकोटस्थित सडक डिभिजन कार्यालयले बुधबार मेलम्ची–अम्बाथान सडकखण्डको १७ किलोमिटर भाग स्तरोन्नति गर्न तीन प्याकेजमा टेन्डर आह्वान गरेको जनाएको छ।

सडक स्तरोन्नतिले आयोजनाको मुहान क्षेत्रमा सहज पहुँच सुनिश्चित हुने र दीर्घकालीन रूपमा मेलम्ची खानेपानी वितरण प्रणाली सुदृढ हुने अपेक्षा गरिएको छ।

गत कात्तिक २० गतेदेखि स्थानीय सहमति पश्चात् मेलम्ची खोलाको पानी फेरि काठमाडौँ पठाउन सुरुङ सञ्चालनमा आएको थियो। अहिले सहमति तत्काल कार्यान्वयनमा आएको उदाहरणले मेलम्ची आयोजनाको स्थायित्व र विश्वास दुवै बढाएको सरोकारवालाको भनाइ छ।