सिन्धुपाल्चोकमा निर्वाचन खर्च प्रयोजनार्थ ५ जना उम्मेदवारले मात्रै खोले बैंक खाता

सिन्धुपाल्चोक । निर्वाचन खर्च प्रयोजनका लागि सिन्धुपाल्चोकमा ५ जना उम्मेदवारले मात्रै बैंक खाता खोलेका छन् । प्रतिनिधि सभा सदस्य निर्वाचन २०८२ का लागि जिल्लामा ३६ जना उम्मेदवारमध्ये अहिलेसम्म ५ जनाले मात्रै बैंक खाता खोलेको आधिकारिक जानकारी कार्यालयमा आएको सूचना अधिकारी शर्मिला चौलागाईंले जानकारी दिए।

दुईवटा निर्वाचन क्षेत्र रहेको सिन्धुपाल्चोकमा दुवै क्षेत्रमा गरी जम्मा ३६ जना उम्मेदवारहरूमध्ये ३१ जनाले अझै बैंक खाता नखोलेको जिल्ला निर्वाचन कार्यालयाले जनाएको छ । साथै बैंक खाता सञ्चालनार्थ कार्यालयबाट २० जना उम्मेदवारले सिफारिस भने लिएको उनले जानकारी दिए ।

जिल्लामा निर्वाचनका लागि तीव्र गतिमा काम भइरहेको जनाएको छ। विभिन्न मतदान केन्द्र तथा स्थलका लागि कर्मचारी खटाइएको र नियुक्ति बुझ्ने काम धमाधम भइरहेको जिल्ला निर्वाचन अधिकृतको कार्यालयले जनाएको छ। मतदान अधिकृत र सहायक मतदान अधिकृतलाई तालिम दिइसकेको र हाल मतपत्र रुजु र प्याकिङको काम भइरहेको निर्वाचन क्षेत्र नम्बर १ का सहायक निर्वाचन अधिकृत हेमा पाण्डेले जानकारी दिए । जिल्लाका विभिन्न मतदान केन्द्रतमा १७ गतेबाट मतपत्र लगायत निर्वाचन सामग्री पठाउने र १८ गतेसम्ममा सबै केन्द्रहरूमा सामग्रीहरू पुगिसक्ने उनले जानकारी दिए।

साथै निर्वाचन आचार संहिता अनुगमन समितिले पनि जिल्लामा तीव्ररूपमा अनुगमनको काम गरिरहेको समितिका प्रवक्ता सहायक प्रमुख अधिकारी सुदर्शन श्रेष्ठले जानकारी दिए । हालसम्म जिल्लामा सामान्य छिटपुट बाहेक आचारसंहिता उल्लङ्घनका घटना नभएको जानकारी दिए । केही ठाउँमा आचारसंहिता विपरीत राखिएका निर्वाचन प्रचार सामग्री हटाउन सचेत गराएपछि हटाइएको उनले जानकारी दिए । साथै हालसम्म जिल्लामा आचारसंहिता उल्लङ्घनका तीनवटा उजुरीहरू परेको र ती उजुरी माथी छानबिन भइरहेको समितिले जनाएको छ।