इन्द्रावतीकाे बिभिन्न वडामा एमाले उम्मेदवार शेरबहादुर तामाङकाे चुनावी गतिविधि

सिन्धुपाल्चोक । सिन्धुपाल्चोक क्षेत्र नम्बर २ मा नेकपा एमालेका उम्मेदवार शेरबहादुर तामाङले चुनावी प्रचारकै क्रममा आज इन्द्रावती गाउँपालिकामा प्रवेश गरेका तामाङले गाउँपालिकाका विभिन्न वडामा घरदैलो कार्यक्रम गरेका छन् ।

गाउँपालिकाको केन्द्र नवलपुरबाट सुरु गरिएको घरदैलो कार्यक्रम आज वडा नम्बर ४ का विभिन्न स्थान हुँदै वडा नम्बर ५ र ६ सँगै ७ नम्बर वडामा पुगेको छ । घरदैलो अभियानका क्रममा उनले स्थानीय बासिन्दासँग प्रत्यक्ष भेटघाट गर्दै आफ्ना आगामी विकास योजनाहरू, प्रतिबद्धताहरू तथा पार्टीका नीति–कार्यक्रमबारे जानकारी गराएका छन् ।

इन्द्रावती गाउँपालिकामा पनि उनलाई स्थानीय बासिन्दा, पार्टी कार्यकर्ता तथा शुभेच्छुकहरूले भव्य स्वागत गरेका थिए । प्रचार अभियानका क्रममा सडक, खानेपानी, शिक्षा, स्वास्थ्य, रोजगारी तथा पूर्वाधार विकासलाई प्राथमिकतामा राख्ने प्रतिबद्धता व्यक्त गरिएको छ । आज वडा नम्बर ७ को भँगेरीमा बास बसी भोली बिहान ७ बजे सोही स्थानबाट पुन घरदैलो कार्यक्रम सुरु गरिने जनाएको छ ।

चुनावी प्रचारप्रसारलाई तीव्र बनाएका तामाङले आफ्नो निर्वाचन क्षेत्रमा पर्ने पाँचपोखरी थाङपाल गाउँपालिका, हेलम्बु गाउँपालिका तथा मेलम्ची नगरपालिकामा चुनावी प्रचारप्रसार सम्पन्न गरिसकेपछि आजदेखि इन्द्रावती गाउँपालिकामा प्रचार अभियान सुरु गरेका हुन् । पाँचपोखरी र हेलम्बु गाउँपालिकामा जनताको अपार माया, समर्थन र उत्साहजनक सहभागिता पाएको बताउँदै उनले जनतासँग सहकार्य गर्दै क्षेत्रको समग्र विकासमा लाग्ने प्रतिबद्धता व्यक्त गरेका छन् ।

प्रचारप्रसार कार्यक्रममा सहभागी एक नेकपा एमाले नेताका अनुसार अहिले सिन्धुपाल्चोक क्षेत्र नम्बर २ मा अत्यन्त सौहार्दपूर्ण र उत्साहजनक माहोल रहेको छ । जनताको व्यापक समर्थन र सकारात्मक वातावरणका कारण यसपटक शेरबहादुर तामाङले निर्वाचनमा आफ्नो जित पक्का रहेको बताएका छन् ।