ऐसेलुखर्क माध्यमिक विद्यालयको ७८ औँ वार्षिकोत्सव सम्पन्न

नवलपुर । एसेलुखर्क माध्यमिक विद्यालयको ७८ औँ वार्षिकोत्सव भव्य रूपमा सम्पन्न भएको छ । कार्यक्रम इन्द्रावती गाउँपालिकाका प्रवक्ता तथा वडा नम्बर ५ का अध्यक्ष शशीनाथ आचार्यको प्रमुख आतिथ्यतामा सम्पन्न भएको हो ।
कार्यक्रममा प्रमुख अतिथि आचार्यले विद्यार्थीहरूको रुचि र चाहनाअनुसार विषयवस्तु चयन गरी अध्ययन–अध्यापन गराउनुपर्नेमा जोड दिए । उनले “एउटा विद्यालयले कम्तीमा एउटा विषयमा विद्यार्थीलाई दक्ष बनाउने उद्देश्यका साथ शैक्षिक प्रणाली अघि पढाउनुपर्ने बताउँदै विद्यालयमा सञ्चालनरत प्राविधिक धारको अध्यापनलाई अझ प्रभावकारी बनाउँदै लैजानुपर्ने आवश्यकता औंल्याए ।
शिक्षा नै समग्र विकासको मेरुदण्ड भएको उल्लेख गर्दै उहाँले शिक्षा प्राप्तिमा कोही पनि पछि पर्न नहुने बताए । साथै विद्यालयमा विद्यार्थी सङ्ख्या वर्षेनी घट्दै गएको विषयमा चिन्ता व्यक्त गर्दै यसका कारण पहिचान गरी समाधानका लागि स्थानीय सरकार तथा सम्बन्धित निकाय चनाखो हुनुपर्ने धारणा राखे ।
नजिकिँदै गरेको एसइई परीक्षालाई लक्षित गर्दै उनले विद्यार्थीहरूलाई मेहनतका साथ अध्ययन गरी उत्कृष्ट नतिजा हासिल गर्न आग्रह गरे । यस विद्यालयमा अध्ययन गरेका विद्यार्थीहरू विशिष्ट स्थान सम्म पुगेको उल्लेख गर्दै अझ उच्च तहमा पुग्ने क्षमता विकासका लागि निरन्तर परिश्रम गर्न सुझाव दिए । वडाको शैक्षिक विकासका लागि वडा कार्यालय र गाउँपालिका सधैं विद्यालयसँग सहकार्यमा रहने प्रतिबद्धता पनि व्यक्त गरे ।
कार्यक्रममा विद्यालय व्यवस्थापन समितिका पूर्व अध्यक्ष मिना मैयाँ थापाले आफ्नो जिम्मेवारीको दौरानमा सक्दो योगदान दिएको उल्लेख गर्दै काम बोलेर होइन, गरेर देखाउनुपर्ने धारणा राखे । आफ्नो क्ष्मताले भ्याएसम्म जिम्मेवारीे कुशलतापूर्वक नेतृत्व बहन बरेको बताउँदै पुनः अभिभावकको माया र सद्भाव प्राप्त भएमा बिद्यालयको बिकाशमा कुनै कसर बाँकी नराख्ने बताउनुभयो ।
नमोबुद्ध आधारभूत विद्यालयका प्रधानाध्यापक मिना पाण्डेले गुणस्तरीय शिक्षाका लागि अभिभावक र शिक्षकबीच एकजुटता आवश्यक रहेको बताउँदै चुनौती चिर्दै अघि बढ्न सबै जुट्नुपर्नेमा जोड दिए ।
कार्यक्रमको समापन गर्दै विद्यालय व्यवस्थापन समितिका जेष्ठ सदस्य तथा कार्यक्रमका सभापति रामप्रसाद गौतमले आगामी विद्यालय व्यवस्थापन समितिको नेतृत्व सक्षम, सक्रिय र काम गर्ने हुटहुटी बोकेको हुनुपर्नेमा जोड दिए ।
वार्षिकोत्सवको अवसरमा हरेक कक्षामा उत्कृष्ट अङ्क ल्याई उत्तीर्ण भएका विद्यार्थीहरूलाई मायाको चिनो र अतिरिक्त क्रियाकलापमा उत्कृष्ट विद्यार्थीहरूलाई मेडलसहित सम्मान गरिएको थियो ।
कार्यक्रममा विद्यालयका प्रधानाध्यापक सुरेश कृष्ण श्रेष्ठले विद्यालयको वार्षिक प्रगति प्रतिवेदन प्रस्तुत गर्दै घट्दो विद्यार्थी संख्या, अभिभावकको चासोको अवस्था, भौतिक तथा शैक्षिक प्रगति र भावी योजनाबारे जानकारी गराए । हाल विद्यालयमा इसिडीदेखि कक्षा १२ सम्म ३२४ जना विद्यार्थी अध्ययनरत रहेको उहाँले जानकारी दिए ।
विद्यालयको वार्षिकोत्सवको अवसरमा वडा नम्बर ४, ५ र ६ का कक्षा ३ मा अध्ययनरत विद्यार्थीहरूबीच गणित दौड प्रतियोगिता आयोजना गरिएको थियो । प्रतियोगितामा सहभागी तथा प्रथम, द्वितीय र तृतीय हुने विद्यार्थीहरूलाई प्रमाणपत्र र नगद पुरस्कार प्रदान गरिएको थियो । प्रतियोगितामा नवलपुर भ्याली स्कुलकी कृतिक्षा शाही प्रथम, एसेलुखर्क माध्यमिक विद्यालयका सुजल अर्याल द्वितीय र नमोबुद्ध आधारभूत विद्यालयकी ऋतु तामाङ तृतीय हुन सफल भए ।
कार्यक्रमको स्वागत मन्तव्य राख्दै विद्यालयका पूर्व प्रधानाध्यापकञ्जरमणि भट्टराईले दिनुभएको थियो । उहाँले विद्यार्थी र अभिभावकको सहभागिता न्यून भएकोप्रति असन्तुष्टि व्यक्त गर्दै विद्यालयको समग्र विकासका लागि सबैको सहयोग आवश्यक रहेको बताउनुभयो ।

कार्यक्रममा विद्यालय व्यवस्थापन समितिका सदस्यहरू पूर्ण दास हिमालय, मानबहादुर श्रेष्ठ, शिक्षक अभिभावक सङ्घका अध्यक्ष राजेन्द्र अर्याल, सदस्यहरू छिमेकी विद्यालयका प्रधानाध्यापकहरु, गणित दौडमा सहभागी विद्यालयका प्रतिनिधि शिक्षकहरु, विद्यार्थीहरु अभिभावक लगायत सरोकारवाला व्यक्तिहरूको उल्लेख्य सहभागिता रहेको थियो ।