चौतारा–नवलपुर–मेलम्ची सडक निरीक्षणमै भेटियाेअनियमितता: क्रसर मटेरियलको ठाउँमा माटो–ढुंगा प्रयाेग

चौतारा–नवलपुर–मेलम्ची सडकखण्डको झ्याडीदेखि भेडिचौरसम्म भइरहेको सडक निर्माणमा गम्भीर अनियमितता पाइएको छ।

करिब २२ करोड ८३ लाख रुपैयाँ लागतमा निर्माण भइरहेको यो सडकमा ठेकेदार अमर ज्योति कन्स्ट्रक्सनले सम्झौता तथा प्राविधिक मापदण्डविपरीत क्रसर मटेरियलको सट्टा माटो र ठूला ढुंगा प्रयोग गरी सब–बेस बिछ्याएको स्थानीय र प्राविधिकहरूले बताएका छन्।

मापदण्डअनुसार २० सेन्टिमिटर क्रसर मटेरियल अनिवार्य रहे पनि प्राकृतिक सामग्री प्रयोग गरिएको पुष्टि भएपछि प्रदेश सभा सदस्य युवराज दुलाल स्वयं स्थलगत निरीक्षणमा पुगेका थिए। उनले सामग्री र कार्यविधिप्रति असन्तुष्टि जनाउँदै सार्वजनिक धनको दुरुपयोग भएको टिप्पणी गर्दै तत्काल निर्माण रोक्न र प्राविधिक परीक्षणपछि मात्र काम अघि बढाउन निर्देशन दिएका छन्।

वर्षौको प्रतीक्षापछि सुधार प्रक्रिया सुरु भएको सडकमा प्रारम्भिक चरणमै अनियमितता देखिएपछि स्थानीय आक्रोशित बनेका छन्। दैनिक आवतजावत, व्यवसाय तथा विद्यार्थीहरूको यातायातमा वर्षौँदेखि कठिनाइ झेल्दै आएका उनीहरूले फेरि गुणस्तरहीन कामले दीर्घकालीन असर पार्ने चिन्ता व्यक्त गरेका छन्।

पुर्वाधार विकास कार्यलयका इन्जिनियर सुजन भट्टले मंसिर ११ गते नै निर्माण रोक्न पत्र पठाएको तर ठेकेदारले अवहेलना गर्दै बेस बिछ्याउने काम अघि बढाएको बताए। उनका अनुसार प्राविधिक परीक्षण नगरी काम अघि बढाउनु अनियमितता लुकाउने प्रयास हुनसक्छ।

निर्माण व्यवसायका प्रतिनिधि सन्दीप आचार्य भने सबै काम सम्झौताअनुसार भएको दाबी गर्दै प्राकृतिक सामग्री केही तहमा प्रयोग गर्न मिल्ने प्राविधिक व्याख्या रहेको बताएका छन्।

स्थानीय, जनप्रतिनिधि र निरीक्षण टोलीले यस्ता दाबी अस्वीकार गर्दै अनियमितता प्रष्ट भएको बताएको छ। सरोकारवालाबीच समन्वय अभाव, निगरानी कमजोरी र ठेकेदारको मनोमानी मुख्य समस्या रहेको निष्कर्ष निकालिएको छ। अब प्राविधिक परीक्षण, गुणस्तर मापन, कडाइयुक्त अनुगमन र जिम्मेवारी तोकिएपछि मात्र सडकको वास्तविक अवस्थाबारे स्पष्टता आउने स्थानीयले अपेक्षा गरेका छन्।

सार्वजनिक धनमा निर्माण भइरहेको महत्त्वपूर्ण सडक भएकाले पारदर्शिता र उत्तरदायित्व सुनिश्चित गर्न सबै पक्ष गम्भीर हुनुपर्ने आवश्यकताको संकेत गरिएको छ।