सिन्धुपाल्चोकमा छिटोछरितो सेवाका लागी भौगोलिक क्षेत्र अनुसार इलाका प्रशासन कार्यालय स्थापना गर्न माग सहित ध्यानाकर्षण

१७ भदाै

काठमाडाैँ ।

सिन्धुपाल्चोक जिल्ला सेवा सुविधा लिने क्रममा तीन जिल्लाजस्तो कठिनाइ भोगिरहेको भन्दै इलाका प्रशासन कार्यालय थप स्थापना गर्नुपर्ने माग सहित काठमाडौंमा सरोकारवाला मन्त्रीहरूलाई भेटी ज्ञापनपत्र बुझाएका छन् ।

बागमती प्रदेशकै सबैभन्दा ठूलो भौगोलिक क्षेत्र भएको सिन्धुपाल्चोक जिल्लामा प्रशासनिक सेवाको सहज पहुँच र आवागमन समस्याको समाधानका लागि स्थानीय तह, विभिन्न दलका नेता तथा जनप्रतिनिधिहरूले इलाका प्रशासन कार्यलयको स्थापनाको माग गर्दै पुर्व मन्त्री तथा नेकपा एमाले स्थायी कमिटी सदस्य शेर बहादुर तामाङको नेतृत्वमा गएको प्रतिनिधि टोलीले गृहमन्त्री रमेश लेखकलाई सिंहदरबारमा भेटी ज्ञापनपत्र बुझाएको हो ।

ज्ञापनपत्रमार्फत जिल्ला प्रशासन, मालपोत, नापी लगायतका सेवाहरूलाई छिटोछरितो ढंगले उपलब्ध गराउन मेलम्ची र बाह्रबिसेमा छुट्टाछुट्टै इलाका प्रशासन कार्यालय स्थापना गर्न माग गरिएको छ ।

मेलम्ची इलाका प्रशासन अन्तर्गत हेलम्बु गाउँपालिका, पाँचपोखरी थाङपाल गाउँपालिका, मेलम्ची नगरपालिका र ईन्द्रावती गाउँपालिकाका ४ देखि १२ नम्बर वडाहरू समेटिने प्रस्ताव गरिएको छ । बाह्रबिसे इलाका प्रशासन अन्तर्गत भोटेकोशी गाउँपालिका, बाह्रबिसे नगरपालिका, त्रिपुरासुन्दरी गाउँपालिका, लिसंखुपाखर गाउँपालिका, बलेफी गाउँपालिकाको ८ नम्बर वडा र सुनकोशी गाउँपालिकाको ६ र ७ नम्बर वडा रहने माग गरिएको छ ।

भेटमा पाँचपोखरी थाङपाल गाउँपालिका अध्यक्ष टासी लामाले नागरिकलाई सामान्य प्रशासनिक सेवा लिन दिनौं पैदल हिँड्नुपर्ने बाध्यता भएको उल्लेख गर्दै तत्काल कार्यालय विस्तार आवश्यक रहेको बताए ।

त्यस्तै, बागमती प्रदेशका पुर्व मन्त्री तथा एमाले केन्द्रीय सदस्य सरेश नेपालले संघीयताको मर्मअनुसार जनतालाई नजिकमै सेवा सुविधा उपलब्ध गराउनुपर्नेमा जोड दिँदै गृहमन्त्रालयले यो मागलाई गम्भीरतापूर्वक लिनुपर्ने धारणा राखे ।