प्याब्सन सिन्धुपाल्चोकद्वारा एसईईमा उत्कृष्ट नतिजा प्राप्त गर्ने विद्यार्थी सम्मानित

२८ असार २०८२
मेलम्ची सिन्धुपाल्चोक ।
निजी तथा आवासीय विद्यालय अर्गनाइजेसन नेपाल (प्याब्सन) सिन्धुपाल्चोककाे आयाेजनामा माध्यमिक शिक्षा परीक्षा (एसईई) सम्मान कार्यक्रम आज प्रगति अंग्रेजी मा.वि. मेलम्चीमा सम्पन्न भएको छ । माध्यमिक शिक्षा परीक्षा २०८१ मा सिन्धुपाल्चोक जिल्लाका ८ वटा संस्थागत विद्यालयबाट ११८ जना विद्यार्थी सहभागी भएकोमा ३.२० भन्दा माथि जिपिए प्राप्त गर्ने १०६ जना विद्यार्थीहरुलाई आज सम्मानित गरिएको हाे ।

सम्मान कार्यक्रममा ४.० जिपिए सहित जिल्लाकै सर्वाेत्कृष्ट नतिजा हासिल गर्न सफल प्रगति अंग्रेजी मा.वि. मेलम्चीका छात्र प्रसान्त चालिसे र ३.९७ जिपिए सहित संस्थागत विद्यालयकाे छात्रा तर्फ प्रथम हुन सफल मेलम्ची कम्युनिटी सेकेन्डरी स्कुलकि छात्रा प्रनिशा कार्कि जनही ४१ हजार १ सय ११ नगद, पदक र प्रमाणपत्र सहित सम्मानित भएका थिए । सर्वाेत्कृष्ट नतिजा हासिल गर्ने छात्र/छात्राहरुलाई कार्यक्रमका विशिष्ट अतिथिहरु मेलम्ची नगरपालिकाका उप प्रमुख उमा प्रधान र शिक्षा विकास तथा समन्वय इकाई सिन्धुपाल्चोकका प्रमुख बैकुण्ठ सुवेदीले सम्मानित गरेका थिए ।

त्यसैगरी कार्यक्रममा सिन्धुपाल्चोक जिल्लाबाट प्रतिनिधित्व गर्दै प्याब्सनकाे केन्द्रीय सदस्य निर्वाचित कर्मवांगेल लामा,बागमती प्रदेश उपाध्यक्ष ऋषिराम नेपाल र बागमती प्रदेश सहसचिव ओमप्रकाश उप्रेतीलाई समेत विशेष सम्मान प्रदान गरिएको थियोे । प्याब्सन सिन्धुपाल्चोक अध्यक्ष बुद्धिप्रसाद आचार्यकाे सभापतित्वमा सम्पन्न कार्यक्रममा मेलम्ची नगर उप- प्रमुख उमा प्रधान, शिक्षा विकास तथा समन्वय इकाई सिन्धुपाल्चोकका इकाई प्रमुख बैकुण्ठ सुवेदी लगायतले शुभकामना मन्तब्य राखेका थिए ।