किसानलाई मलको व्यवस्था गर्न सरकारलाई सभामुखको ध्यानाकर्षण

२९ जेठ । काठमाडौं, सम्माननीय सभामुख अग्निप्रसाद सापकोटाले किसानलाई मल उपलब्ध गराउन सरकारका नाममा ध्यानाकर्षण गर्नु भएको छ ।
आज बसेको प्रतिनिधि सभा बैठकमा सांसदहरूले किसानले बाली लगाउने समयमा मल प्राप्त गर्न नसकेको भन्दै सभामुखबाट सरकारका नाममा रुलिङको माग गरेका थिए । सभामुख सापकोटाले आइतबारको प्रतिनिधिसभा बैठकमा कृषकहरूलाई मल उपलब्ध गराउन सरकारको ध्यानाकर्षण गराउनु भएको हो ।
कृषकहरूलाई यथाशीघ्र मल उपलब्ध हुनेगरी व्यवस्थापन गर्न सरकारलाई सभामुखले ध्यानाकर्षण गराउनु भएको हो । ‘खेतीको समयमा पनि मल उपलब्ध नभइरहेको सन्दर्भमा माननीय सदस्यहरूले उठाउनुभएको कुरामा मेरो ध्यानाकर्षण भएको छ, सभामुख सापकोटाले भन्नुभयो, यथाशीघ्र कृषकहरूलाई मल उपलब्ध हुन सक्ने गरी व्यवस्थापन गर्न, गराउन म सम्बन्धित मन्त्री एवं नेपाल सरकारको ध्यानाकर्षण गराउँदछु ।’ प्रतिनिधिसभा बैठकको शून्य समयमा बोल्ने सांसदहरूले खेतीको समयमा पनि मलको अभाव भएको भन्दै मलको व्यवस्थापन गराउन सरकारसँग माग गरेका थिए ।
यसैगरि सभामुख सापकोटाले तातोपानी भन्सार कार्यालयमा रासायनिक मल रोकिएको विषयमा चासो व्यक्त गर्नु भएको छ । केही दिन यता तातोपानी भन्सारमा ९ हजार ९ सय ७० बोरा (५० मेक्ट्रिक्टन) मल रोकिएको सन्दर्भमा सभामुख सापकोटाले तातोपानी भन्सार प्रमुख नारद गौतम मार्फत जानकारी लिनु भएको हो ।

गौतमले भन्सार कार्यालयका कारण मल नरोकिएको स्पष्ट गर्दै कृषि सामग्री कम्पनीका तर्फबाट कार्य अघि बढाइनु पर्ने बताउनु भयो । उहाँले भन्सार कार्यालयमा रहेको मल बाहिर लान कृषि सामग्री कम्पनी लिमिटेडका तर्फबाट रासायनिक मलको स्वतन्त्र रुपमा गुणस्तर परिक्षण गरी त्यसको प्रतिवेदन प्राप्त हुनु पर्ने जानकारी दिनु भयो । कृषि सामग्री कम्पनी लिमिटेडले भने अदालतको आदेशलाई आधार मानेर काम अघि बढाउने जानकारी दिएको छ । सुचना अधिकारी पुन्य प्रसाद उपाध्यायले अदालतको पत्र पछि काम अघि बढाउने जानकारी दिनु भयो ।