सिन्धुपाल्चोकमा गठबन्धन दल बिच हुनसकेन पुर्ण तालमेल

सिन्धुपाल्चोकमा रहेको १२ स्थानीय तहमध्ये ६ वटामा तालमेल हुने देखिएको छ । सोमबार गरेको मनोनयनपत्र दर्ताको अवस्था हेर्दा दुई स्थानीय तहमा सत्ता गठबन्धन दल काँग्रेस, माओवादी केन्द्र र एकीकृत समाजवादीबीच तालमेल हुने निश्चित छ । चार स्थानीय तहमा माओवादी केन्द्र र एकीकृत समाजवादीबीच तालमेल हुने देखिन्छ ।

जुगल गाउँपालिकामा माओवादी केन्द्रका रेशम स्याङ्बो अध्यक्ष र काँग्रेसका हिमाल श्रेष्ठले उपाध्यक्षमा मनोनयन दर्ता गराएका छन् । सात वडामा तीन माओवादी, तीन काँग्रेस र एक समाजवादीका उम्मेदवारले नाम दर्ता गराएका छन् ।

पाँचपोखरी थांपाल गाउँपालिकामा माओवादी केन्द्रका दोर्जे स्याङ्बो र काँग्रेसकी गंगा चापागाइँले मिलेर मनोनयनपत्र दर्ता गराएका छन् ।

चार स्थानीय तहमा माओवादी केन्द्र र एकीकृत समाजवादीले तालमेल गर्ने भएका छन् । चौतारा साँगाचोकगढी नगरपालिकामा माओवादी केन्द्रका कृष्णप्रसाद सापकोटा मेयर र एसकी सीता थापाले उपमेयरमा नाम दर्ता गरेकी छन् । १४ वडामा पनि भागबण्डा गरिएको छ । १४ मध्ये समाजवादीले तीनवटामा अध्यक्ष पाएको छ । मेलम्ची नगरपालिकामा एकीकृत समाजवादीका नानीराम चौलागाइँ मेयर र माओवादीका देबेन्द्र घोरासैनीले उपमेयरमा नाम दर्ता गराएका छन् । त्यसैगरी हेलम्बु गाउँपालिकामा माओवादीका पेमा हेल्मो र एसका सुजन पाख्रिनले मिलेर चुनाव लड्दैछन् । बलेफी गाउँपालिकामा माओवादी केन्द्रका गंगाबहादुर तामाङ अध्यक्ष र समाजवादीका डिबी थापा उपाध्यक्षमा उठेका छन् । माओवादी र एकीकृत समाजवादीले जिल्लाभर तालमेल गर्ने भएका छन् । सुनकोसी गाउँपालिकामा माओवादीकी कृष्णकुमारी कुवँरले अध्यक्षमा मनोनयन दर्ता गरेकी छिन् । स्थानीय तहको प्रमुखमा राजनीतिक दलबाट टिकट पाएर नाम दर्ता गराउने उनी पहिलो महिला हुन् ।