पत्रकार आचार्यले छाडे सिन्धुपाल्चोक

चौतारा
फेसबुक स्ट्याटस लेख्दै वरिष्ठ पत्रकार सुदर्शन आचार्यले सिन्धुपाल्चोक छोडेको जनाएका छन् । उनी इन्द्रावती गाउँपालिका वडा नं. १० भोटसिपाका हुन् । ‘आजबाट औपचारिक रुपमा काठमाण्डुको स्थायी वासिन्दा, जन्म दिने माटोलाई नमस्कार’ स्ट्याटसमा आचार्यले लेखेका छन् ।
लामो समयदेखि पत्रकारिता र राजनीतिमा सक्रिय आचार्य पछिल्लो समय सिन्धु काँग्रेसको गतिविधिबाट रुष्ट थिए । महाधिवेशन प्रतिनिधि लडेका उनलाई आन्तरिक धोकाधडीले पराजित गरेको थियो । कूटनीतिमा माहिर आचार्यलाई जिल्लाका काँग्रेस नेतृत्वले बेवास्ता गरेपछि जिल्ला छोडेको अनुमान गरिएको छ । उनको काँग्रेस केन्द्रीय नेताहरुसँग राम्रो सम्बन्ध छ ।
पत्रकार महासंघ सिन्धु शाखामा सधैँ नेतृत्वदायी भूमिकामा रहने आचार्यलाई गत जिल्ला अधिवेशनबाट प्रेस युनियनले पराजय ब्यहोरेपछि दबाब परेको थियो । प्रेस सेन्टर र चौतारीबीचको एलायन्सबाट जीवन श्रेष्ठ अध्यक्ष भएका हुन् । युनियनको पराजयको दोष पनि उनैलाई लगाइएको छ । यद्यपि, आचार्य पत्रकारिता र राजनीतिमा राम्रो दख्खल राख्ने व्यक्तित्व हुन् । जिल्लामा पनि सबै पार्टी र तिनका नेतासँग उनको राम्रै उठबस छ । सिन्धु छोडेका आचार्य काठमाण्डुमा काँग्रेस नेतासँग नजिकिएर काम गर्न थालेका छन् । उनको डिजिटल पत्रिका मध्यविन्दु अनलाइन काठमाडौंबाट सञ्चालनमा छ ।