भोटेकोशीमा माओवादी केन्द्र पहिलो पार्टी हो–आङ्छिरी शेर्पा, नेता,नेकपा (माओवादी केन्द्र) भोटेकोसी

आगामी बैशाख ३० गते देशैभर एकैसाथ हुनलागेको  स्थानीय तह निर्वाचनका लागी सबै प्रमुख राजनैतिक दलहरु उम्मेदवार छनौट देखी लिएर बिबिध गतिबिधिमा क्रियाशिल देखिएका छन । सबै पार्टीमा पालिका प्रमुख, उपप्रमुख देखि वडा अध्यक्ष सम्मकालागी प्रशस्तै आकांक्षीहरु देखिएका छन । त्यस्तै आकांक्षीहरु मध्ये सिन्धुपाल्चोक जिल्ला भोटेकोशी गाँउपालिकाको  अध्यक्षका आकांक्षी नेकपा (माओवादी केन्द्र) का नेता आङ्छिरी शेर्पा संग नयाँपानी खबरका लागि रामकृष्ण थापाले  गरेको कुराकानीको सक्षिप्त अंश :

स्थानीय तह चुनावमा तपाइँको आकांक्षा रहेको पाइयो । यति महंगो चुनाव किन लड्न चाहनुहुन्छ ?

भोटेकोसी गाउँपालिकामा राजनीतिलाई बुझेर सचेत रुपमा राजनीतिमा क्रियाशील भएको नाताले निर्वाचनजस्तो राजनीतिको महा उत्सवमा मेरो पनि आकांक्षा नहुने भन्ने होइन । तर, केही अग्रज साथीहरु पनि हुनुहुन्छ । उहाँहरुको साथ समर्थन हुने हो भने म पछि हट्ने कुरा छैन । जहाँसम्म महंगो चुनावको कुरा छ, राजनीतिलाई पेशा होइन सेवा बनाउनुपर्छ भन्ने मेरो मान्यता हो । तपाइँको मिडियामार्फत् भोटेकोसीवासीलाई अपिल र अनुरोध गर्न चाहन्छु कि क्षणिक स्वार्थ नहेरी निर्वाचन पछि दीर्घकालीन विकासको भविष्यबारे सबैले सोच्ने बेला आएको छ । सही र गलत छुट्याएर निर्णय लिँदा भोटेकोसीको दीर्घकालीन हित हुन्छ । यसप्रति भोटेकोसीवासी सचेत छन् र म विश्वस्त छु । चुनावमा भड्किलो खर्च गर्ने र निर्वाचित भएपछि विकास बजेट स्वार्थमा सक्ने परिपाटीलाई हामीले दुत्कार्नु पर्छ । त्यसतर्फ चनाखो रहन म आह्वान गर्छु ।

  तपाइँले टिकट पाउने आधार के–के हुन् ?

भोटेकोसीमा राजनीतिलाई शक्ति र पद ठूलो कि पार्टीको विचार, सिद्धान्त  र एजेण्डा ठूलो ? फरक छुट्याउन सक्ने गरी राजनीतिमा होमिएको युवा भएको नाताले १५–१६ वर्षदेखि निरन्तर राजनीतिक र सामाजिक रुपमा जनताको सेवामै रहेको र मेरो पार्टीको विभिन्न समितिको सचिव, अध्यक्ष हुँदै अहिले पालिका इन्चार्जको रुपमा निरन्तर सक्रिय छु । मैले टिकट पाउने यो भन्दा बलियो आधार अरु के हुनसक्छ ?

 टिकट पाउनुभयो भने चुनावी खर्च कसरी जुटाउनुहुन्छ ?

हाम्रो पालिकामा पाँच वडा छन् । प्रचार–प्रसार मतदाता भेटघाट नेता कार्यकर्ता परिचालनमा त्यस्तो धेरै खर्च हुन्छ भन्ने मैले सोचेको छैन । तैपनि, म आफै १६ वर्षको उमेरदेखि व्यवसाय र राजनीतिलाई सँगै लिएर अगाडि बढेको मान्छे भएकोले चुनावी व्यवस्थापन राम्ररी गर्न सकिन्छ । म राजनीतिक, आर्थिक र सामाजिक सम्बन्धका हिसाबले सक्षम छु । साथमा पार्टीको गौरवशाली इतिहास र उपलब्धीपूर्ण एजेण्डा छन् ।

जनमत माग्ने तपाइँको मार्गचित्र के–के हुन् ?

पहिलो कुरा, राजनीति र सामाजिक रुपमा क्रियाशील भएको मेरो उमेरका मान्छे भोटेकोसीमा कम छन् । भन्नुको अर्थ के हो भने, यहाँ आइपरेका भूकम्प र बाढीपहिरोको महाविपत्तिमा मैले गरेको काम र योगदानबारे सबैलाई अवगत नै छ । यो स्थानीय र व्यावहारिक पक्ष भयो । दोस्रो कुरा हाम्रो पार्टीको नाराहरुमध्ये “समाजवाद उन्मुख समृद्धिको लागि स्थानीय सरकार, माओवादी केन्द्रको स्थानीय सरकार निःशुल्क, शिक्षा, स्वास्थ्य र अनिवार्य रोजगार” भन्ने छ । अर्को पाटो, विशाल छिमेकी चीनको सीमा, यहाँको स्रोतसाधन यहाँको जनताको जीविकोपार्जनसँग जोडेर योजना बनाउने छौं । ५० औं लाख तिरेर ज्यानको बाजी लगाएर शरणार्थी बन्न अमेरिका जाने र अन्य देशमा जाने युवा शक्तिहरु भोटेकोसीमा रोक्ने र शिक्षा, स्वास्थ्य रोजगारको शिलशिलामा काठमाण्डौं बस्ने धेरै भोटेकोसीवासीलाई गाउँमै बस्ने वातावरण सिर्जना गर्नको लागि कृषि र पर्यटनमा तत्कालीन र दीर्घकालीन योजनाहरु बनाउँदै समृद्ध भोटेकोसीको प्रष्ट चित्र कोरेर जनतासमक्ष जाने हो ।

तपाइँको पार्टी र अन्य प्रतिस्पर्धी दलको हालको अवस्था कस्तो छ ?

भोटेकोसीमा हाम्रो पार्टीको संगठित सदस्य १४ सय ४४ जना छन् । संगठनमा युवा, पढेलेखेका र सचेत मानिस बढी आबद्ध छन् । विचार, संगठन, नेतृत्व र एजेण्डा सबै हिसाबले माओवादी केन्द्र पहिलो पार्टी हो । काँग्रेस दोस्रो शक्ति हो । तर, त्यहाँ व्यक्तिवादी प्रवृत्ति बढी छ । एमालेको संगठन राम्रो थियो तर अहिले विभाजनको शिकार भएको छ । एमाले र एकीकृत समाजवादीको अवस्था उस्तैउस्तै छ ।