राप्रपामा राणाको तेस्रो धार

चुनावी सरगर्मी बढिरहेको बेला राप्रपा सिन्धुपाल्चोकमा आन्तरिक कलह बढेको पाइएको छ । अध्यक्ष निलध्वज थापा र पूर्वअध्यक्ष गोपाल श्रेष्ठको आ–आफ्नै समुह छ । त्यसमाथि अहिले तेस्रो धार जन्मिएको छ । तेस्रो धारको नेतृत्व राणाको विश्वासपात्र कृष्ण गिरीले गरेको बताइएको छ ।
थापा र श्रेष्ठको गतिविधि निष्क्रिय भएपछि गिरीले आफूनिकट कार्यकर्ता लिएर चुनावी प्रचारमा लागेका हुन् । उनी जिल्लाका पूर्वकोषाध्यक्ष हुन् । पशुपति शम्सेर राणालाई राजा भनेर संबोधन गर्ने गिरी राप्रपाभित्रका प्रतिवद्ध संगठक हुन् ।
पशुपति शम्सेर राणाले आउँदो चुनावमा भोट बढाउन समुह–समुह बनाएर जिल्ला पठाएको विश्लेषण गरिएपनि राप्रपाभित्र आन्तरिक कलह चुलिएको बताइन्छ । गत निर्वाचनमा राणाले ३१ हजार मत प्राप्त गरेका थिए । कांग्रेससँग गठबन्धन गरेर ल्याएको मत कसरी सुरक्षित गर्ने भन्ने चिन्तामा राणा रहेको पाइएको छ । ‘हाम्रो मत ३० हजार हो पशुपति राजालाई यसपटक जिताउन हामी लाग्नेछौं,’ गिरीले भने । आन्तरिक गुटबन्दी र खराब कार्यकर्ताले राप्रपा बिगारेको उनको भनाइँ छ ।

सत्ताघटक पार्टीहरुको गठबन्धन कायम रहे राणालाई यसपटक पनि चुनाव जित्न मुश्किल छ । गठबन्धनबाट कांग्रेस वा माओवादीका उम्मेदवार हुँदा राणाले एमालेसँग गठबन्धन गर्नुपर्ने हुन्छ । तर, यो सहज छैन । एमालेका नेता शेरबहादुर तामाङले राणालाई छोड्ने अवस्था छैन । माओवादी केन्द्रका नेता युवराज दुलाल मेलम्ची बाढीदेखि स्थानीयको दुःखमा साथै रहेकोले उनको क्रेज निकै बढेको छ । मेलम्ची क्षेत्रमा माओवादी पनि अरु पार्टीको हाराहारीमा पुगेको स्थानीय बताउँछन् । राप्रपा नेता गिरीले बताएअनुसार यसपटक पनि राणा नै चुनाव लड्ने तयारीमा छन् । राणाको अभियानलाई सफल पार्न गिरी भित्रभित्रै मत सर्वेक्षणमा लागेका छन् । ‘हाम्रो पार्टीबाट ‘राजा’ आफै उम्मेदवार बन्ने सम्भावना बढी छ,’ उनले भने, ‘गठबन्धन हुँदा उहाँको जित निश्चित छ ।’ राप्रपाका कार्यकर्ता छिन्नभिन्न भएकोले नयाँ र युवा पंक्तिलाई रोजगार दिएर पार्टीको अवस्था सुधार्ने उनले बताए । राणाले त्यही तयारी गर्न तेस्रो धार बनाएर गिरीलाई परिचालन गरेका हुन् । पूर्वअध्यक्ष श्रेष्ठ, जितबहादुर भारतीलगायत थुप्रै नेता र पुराना कार्यकर्तासँग राणा रुष्ट छन् । पार्टीको कामलाई भन्दा आर्थिक उपार्जनतिर लाग्ने कार्यकर्तालाई पछाडि हटाएर नयाँ संगठन बनाउने तयारी गिरीले गरेका छन् । अध्यक्ष निलध्वज थापाले पार्टीलाई भनेजसरी अगाडि बढाउन नसकेको राणाको निश्कर्षसहित गिरीले तेस्रो समुह बनाएर जिल्ला आएको बताएका छन् ।