सिन्धुपाल्चोक काँग्रेस सभापतिमा जंगबहादुर

नयाँपानी खबर
कोइराला पक्षका बंशलाल तामाङलाई हराउँदै सिन्धुपाल्चोक काँग्रेसको सभापतिमा संस्थापन पक्षधर जंगबहादुर तामाङ विजयी भएका छन् । तामाङले दोस्रो चरणको निर्वाचनमा खसेको १७ सय ८७ मध्ये नौ सय १२ मत प्राप्त गरे । प्रतिद्वन्द्वी बंशलालले आठ सय ४८ मत ल्याए ।
पहिलो चरणमा तेस्रो भएका संस्थापन पक्षका डा. प्रेमध्वज लामाले दोस्रो भएका बंशलाललाई समर्थन गरे पनि दुई उम्मेदवारको मत योगलाई पछि पारेर जंगले जित निकालेका हुन् ।
लामो समयदेखि संस्थापन पक्षधर लामाले चुनाव लड्न त्रिभुवन विश्वविद्यालयको उपप्राध्यापकबाट राजीनामा दिएका थिए । अन्तिम समयमा केन्द्रीय सदस्य मोहनबहादुर बस्नेतले धोका दिएर संस्थापनको टिकट जंगबहादुरलाई दिएपछि लामा बागी उम्मेदवार उठेका थिए । पहिलो चरणको मतपरिणाम आएसँगै पत्रकार सम्मेलन गरेर उनले बंशलाललाई समर्थन गर्ने घोषणा गरेका थिए । पार्टीलाई अब्बल बनाउने उद्देश्यले गर्दै आएको पेशा नै त्यागेँ । तर, केन्द्रीय सदस्य बस्नेतले धोका दिनुभो । त्यसैले विद्रोह गरेर कोइराला पक्षका बंशलाललाई समर्थन गरेको हुँ,’ भावुक हुँदै उनले भने ।
लामासँगै संस्थापन पक्षका धेरै महाधिवेशन प्रतिनिधिले विद्रोह गरेर कोइराला पक्षका तामाङलाई मतदान गरेका थिए । तर, संस्थापन पक्ष निकै बलियो भएकोले कोइराला पक्ष सफल हुन सकेन ।