इन्द्रावती साना किसान सहकारीको चाैथाे साधारणसभा सम्पन्न

इन्द्रावती गाउँपालिका वडा नं २ कुञ्चाेक स्थित इन्द्रावती साना किसान कृषि सहकारी संस्था लिमिटेडकाे चाैथाे वार्षिक साधारणसभा सम्पन्न भएकाे छ । कुञ्चाेक जाैडाँडामा रहेको महेन्द्र माध्यमिक विद्यालयकाे प्रांगणमा आयाेजित चाैथाे साधारणसभाकाे उदघाटन नेकपा (एमाले) का केन्द्रीय सदस्य एवं सिन्धुपाल्चोक जिल्ला प्रतिनिधिसभा क्षेत्र नं २ का सांसद , पुर्व कानुनमन्त्री शेरबहादुर तामाङले चार वटै केक काटेर गरेका थिए । कार्यक्रमलाई सम्बाेधन गर्दै पुर्वमन्त्री तामाङले सहकारीकाे माध्यम बाटै समाजकाे आर्थिक र सामाजिक रुपान्तरण सम्भव हुने र समुदायले परम्परागत कृषि प्रणाली भन्दा माथि उठेर समयकाे माग बमोजिम आधुनिक पशुपालन तथा कृषि प्रविधिमा लाग्न आग्रह गरे । कार्यक्रमका प्रमुख अतिथि तामाङले सहकारी र स्थानीय कृषकहरुले समयानुकूल नयाँ तरिकाबाट आय आर्जनका कार्यक्रमकाे प्रस्तावना ल्याएमा माथिल्लो तहबाट अनुदान र बजेट व्यवस्थापन गर्न आफुले पहलकदमी गर्ने प्रतिबद्धता समेत व्यक्त गरे ।                     

कार्यक्रममा नेकपा (एमाले) का जिल्ला अध्यक्ष झम्क नेपाल , जिल्ला समन्वय समितिका सभापति कृष्णगाेपाल तामाङ , नेकपा (माओवादी केन्द्र) का नुनबहादुर सापकोटा (मनाेज) , नेपाली कांग्रेसका बलराम गिरी , महेन्द्र माविका विद्यालय व्यवस्थापन समिति अध्यक्ष रामबहादुर सुनार लगायतले शुभकामना व्यक्त गरेका थिए भने सुर्यमुखी साना किसान सहकारीका अध्यक्ष एवं एमाले नेता मित्रलाल चाैलागाईले सहकारी सम्बन्धि प्रशिक्षणात्मक मन्तव्य राखेका थिए ।
संस्थाका काेषाध्यक्ष भुपेन्द्र बानियाँले प्रस्तुत गरेको आर्थिक प्रतिवेदन अनुसार संस्थाका कुल शेयर सदस्य ६ सय २२ जना रहेका छन भने गत असार मसान्तसम्मकाे कुल चुक्ता शेयर पुँजी २३ लाख र कुल काराेबार १ कराेड ३१ लाख रहेको छ त्यस्तै संस्थाकाे यस आ.व. काे सञ्चालन नाफा करीब २ लाख ३२ हजार रहेकाे छ । संस्थाका अध्यक्ष रामशरण गिरीकाे सभापतित्व र सिताराम गिरीकाे सञ्चालनमा कार्यक्रम सम्पन्न भएको थियोे ।