सिन्धुपाल्चोकमा पनि रास्वपाको ठूलो प्रभाव, १ क्षेत्र प्रत्यक्ष जित्दा दुवै क्षेत्रमा समानुपातिक तर्फ पहिलो

सिन्धुपाल्चोक । देशैभर राष्ट्रिय स्वतन्त्र पार्टीका उम्मेदवारहरूले वर्चस्व बनाउँदा  २ वटा निर्वाचन क्षेत्र रहेको सिन्धुपाल्चोकमा पनि निर्वाचनको मतपरिणामले जिल्लाको राजनीतिक प्रतिस्पर्धा निकै रोचक बनेको देखियो । प्रत्यक्षतर्फ दुवै क्षेत्रमा फरक–फरक दलका उम्मेदवार अगाडि देखिँदा समानुपातिकतर्फ भने राष्ट्रिय स्वतन्त्र पार्टी (रास्वपा) ले उल्लेख्य मत प्राप्त गर्दै पहिलो दल बनेको छ ।

सिन्धुपाल्चोक क्षेत्र नम्बर १ मा प्रत्यक्षतर्फ रास्वपाका उम्मेदवार भरत पराजुली २४ हजार ४१२ मतसहित विजयी हुँदा उनका निकटतम प्रतिद्वन्दी नेकपाका माधव सापकोटा ले १७ हजार ३२७ मतसहित प्राप्त गरेका छन् छन्। यस्तै एमालेका सरेस नेपाल ११ हजार ९६१ मतसहित तेस्रो हुँदा कांग्रेसका जंग लामा ११ हजार २९३ मत प्राप्त गर्दै चौथो स्थानमा खुम्चिन पुगे । यहाँ अघिल्लो निर्वाचनमा हाल दोस्रो स्थान हासिल गरेका माधव सापकोटाले विजय हासिल गरेका थिए।

उक्त क्षेत्रमा समानुपातिकतर्फ पनि रास्वपाले २७ हजार ५२५ मत प्राप्त गर्दै पहिलो दल बनेको छ । त्यसपछि नेकपाले १२ हजार ५४२, एमालेले १० हजार २२५ र कांग्रेसले ९ हजार ६२८ मत प्राप्त गरेका छन्।

त्यस्तै सिन्धुपाल्चोक क्षेत्र नम्बर २ मा प्रत्यक्षतर्फ नेकपाका युवराज दुलाल २१ हजार ६९९ मतसहित विजयी हुँदा नेपाली कांग्रेसका वंशलाल तामाङले १९ हजार १४६ मत प्राप्त गरे । एमालेका शेरबहादुर तामाङ १५ हजार ९२६ मतसहित तेस्रो हुँदा राष्ट्रिय स्वतन्त्र पार्टीका झलक कुमार श्रेष्ठ (अजय) १४ हजार ०१९ मतसहित चौथो भए । यता भने अघिल्लो निर्वाचनमा नेपाली कांग्रेसका मोहनबहादुर बस्नेतले विजय हासिल गरेका थिए।

तर समानुपातिकतर्फ भने यस क्षेत्रमा पनि रास्वपा कै बर्चस्व देखियो । रास्वपाले २५ हजार ८७० मत प्राप्त गर्दा कांग्रेसले १४ हजार ४९१, एमालेले १३ हजार २५७ र नेकपाले १२ हजार ८९७ मत प्राप्त गरेका छन्।

समग्र मतपरिणामले सिन्धुपाल्चोकमा परम्परागत दलहरूसँगै नयाँ शक्तिका रूपमा उदाएको रास्वपाको प्रभाव उल्लेखनीय रूपमा बढेको देखिएको छ । प्रत्यक्षतर्फ भने पुराना दलहरूबीच कडा प्रतिस्पर्धा हुँदा क्षेत्र नम्बर १ मा रास्वपाका उम्मेदवारले बाजी मार्दा क्षेत्र नम्बर २ मा भने नेकपाले विजय हासिल गरे ।

यसले सिन्धुपाल्चोकको राजनीतिक समीकरण बदलिँदै गएको र मतदाताको झुकाव नयाँ दलतर्फ बढ्दै गएको संकेत गरेको यसपटकको चुनावी नतिजाले देखाएको छ।