सिन्धुपाल्चोकमा ६ मतदान स्थल अति संवेदनशील

सिन्धुपाल्चोक । आगामी निर्वाचनका लागि सिन्धुपाल्चोक जिल्लामा मतदान स्थलको सुरक्षा अवस्थालाई आधारमा वर्गीकरण गरिएको छ। जिल्ला निर्वाचन कार्यालयका अनुसार जिल्लामा रहेका छवटा मतदान स्थल अति संवेदनशील रहेको विश्लेषण गरिएको छ। त्यस्तै ६३ वटा संवेदनशील र ७७ वटा मतदान स्थल सामान्य रहेको जिल्ला निर्वाचन कार्यालयले जनाएको छ।

प्रतिनिधि सभा सदस्यको निर्वाचनका सम्बन्धमा तयारी तथा निर्वाचन व्यवस्थापनका विषयमा जानकारी दिन जिल्ला निर्वाचन कार्यालय सिन्धुपाल्चोकले आयोजना गरेको कार्यक्रमको अवसरमा उक्त कुरा जानकारी गराइएको हो। कार्यक्रममा निर्वाचनलाई निष्पक्ष, शान्तिपूर्ण र विश्वसनीय बनाउन सञ्चारकर्मीहरूको भूमिका महत्वपूर्ण भएकोले सही र तथ्यपरक सूचना प्रवाह गर्न पनि आग्रह गरिएको छ।

निर्वाचन आयोगद्वारा प्रस्तुत तथ्याङ्कअनुसार जिल्लाका दुई निर्वाचन क्षेत्रमा कुल ३६ जना उम्मेदवार चुनावी प्रतिस्पर्धामा रहेका छन्।

निर्वाचन क्षेत्र नम्बर १ र २ मा समान रूपमा १८–१८ जना उम्मेदवार मैदानमा उत्रिएका छन्। क्षेत्र नम्बर १ मा महिला मतदाता ६५ हजार ७२३ र पुरुष मतदाता ७१ हजार २६२ रहेको छ भने कुल मतदाता संख्या १ लाख ३६ हजार ९७५ पुगेको छ।

यस्तै, क्षेत्र नम्बर २ मा महिला मतदाता ६५ हजार ९७३ र पुरुष मतदाता ७२ हजार ०४० रहेका छन्, जसअनुसार कुल मतदाता संख्या १ लाख ३८ हजार ०१३ रहेको छ।
जिल्लाभर कुल मतदाता संख्या २ लाख ७४ हजार ९९८ रहेको निर्वाचन आयोगले जनाएको छ।

कार्यक्रममा प्रमुख जिल्ला अधिकारी रामकृष्ण अधिकारी, नेपाल प्रहिरका जिल्ला प्रमुख काजीकुमार आचार्य, सशस्त्र प्रहरीका प्रमुख नारायण श्रेष्ठ, नेपाली सेनाका प्रमुख, पत्रकार महासंघ सिन्धुपाल्चोकका उपाध्यक्ष दीपक अर्याल लगायतको उपस्थिति रहेको थियो।

कार्यक्रमको अवसरमा निर्वाचनलाई शान्तिपूर्ण, स्वतन्त्र र निष्पक्ष रूपमा सम्पन्न गर्न सुरक्षाको व्यवस्था कडा बनाइने जिल्ला प्रशासन कार्यालयले जनाएको छ।